Oljas Bektenov Stepnogor monoqalasynyń ekonomıkasyn ártaraptandyrýmen tanysty
STEPNOGOR. KAZINFORM — Úkimet basshysy Oljas Bektenov «Qazaqstannyń jylyjaı tehnologııalary» JShS-na baryp, Stepnogor monoqalasynyń ekonomıkasyn ártaraptandyrýmen jáne óńirdiń azyq-túlik qaýipsizdigin qamtamasyz etý sharalarymen tanysty.
Premer-Mınıstr Stepnogor qalasynda ornalasqan elimizdegi eń iri jylyjaılardyń biriniń óndiristik qýatymen tanysyp, shyǵarylatyn ónim túrlerin qarap shyqty. Investıtsııalyq joba 2010 jyly «QazAgroQarjy» AQ qoldaýymen iske qosyldy jáne Aqmola oblysynyń óńirlik Indýstrııalandyrý kartasyna engizilgen.
Búgingi tańda jylyjaı kesheniniń aýdany 4,8 gektardy quraıdy, óndiristik qýaty — jylyna 2400 tonna kókónis. Óndiris jyl boıy elordanyń jańa pisken qııar, qyzanaq jáne askókke degen qajettiligin qamtamasyz etedi.
Sonymen qatar ónimder elimizdiń basqa aımaqtaryna satylady. Bıylǵy sáýir aıynda jobanyń ekinshi kezegi iske qosyldy, onyń sheńberinde jańa kókónis daqyldaryn, atap aıtqanda baıaldy ósirý qolǵa alyndy.
«Qazaqstannyń jylyjaı tehnologııalary» JShS bas dırektory Aleksandr Grıbalev taıaý bolashaqta jylyna 50 tonnaǵa deıin qulpynaı ósirý bólimin salý josparlanyp otyrǵanyn aıtty. Osyǵan baılanysty óndiristik sıpattaǵy birqatar másele, sonyń ishinde jylyjaı kesheniniń qýatyn keńeıtý týraly aıtyldy.
Úkimet basshysy kásiporynnyń elordanyń aınalasynda azyq-túlik beldeýin qalyptastyrý boıynsha júrgizip jatqan jumysynyń mańyzyn atap ótip, beıindi mınıstrlikterge eksporttyq áleýetti ashý úshin otandyq óndirýshige qajetti járdem kórsetýdi tapsyrdy.
Munda Úkimet basshysyna qalanyń sport stadıonyn rekonstrýktsııalaý jospary týraly baıandaldy. Nysan apatty jaǵdaıda tur. Jobaǵa sáıkes, júgirý jolaǵy, jasandy jabyn jáne alańdy jylytý júıesi jańartylady.
Bir trıbýna, trenajer zaly, tır men kıim aýystyratyn bólmeni jóndeý josparlanǵan. Jańa fýtbol alańynyń qurylysy qarastyrylǵan. Brıgadalar qurylysty bólshekteýge osy jyldyń qazan aıynda kirisedi.
Qurylysty 2025 jyldyń ekinshi toqsanynda bastap, 2026 jyldyń jazyna qaraı paıdalanýǵa berý kózdelgen. «Altynalmas» kompanııasy bıznestiń áleýmettik áriptestigi sheńberinde tehnıkalyq tekserýdi, jobany ázirlep, rekonstrýktsııalaýdy óz moınyna aldy.
Premer-Mınıstr ınfraqurylymdy jańǵyrtýdyń mańyzyn atap ótip, Úkimettiń áleýmettik jaýapkershilik aıasynda bızneske jobalardy júzege asyrý úshin qajetti qoldaý kórsetýge daıyn ekenin atap ótti.
Sonymen qatar jumys sapary aıasynda Úkimet basshysy Stepnogor podshıpnık zaýytynyń qyzmetimen tanysty. Kásiporyn eldegi podshıpnıkterdiń 100%-yn óndiredi jáne mashına jasaý men basqa da salalardyń damýynda mańyzdy ról atqarady. 2 myńnan astam adam jumyspen qamtylǵan.
Zaýyt byltyr 20,2 myń tonna, osy jyldyń 7 aıynda 16,3 myń tonna podshıpnık shyǵardy. Bul rette jobalyq qýaty jylyna 1,7 mln podshıpnıkke jetedi.
Óndiristik jelini qarap shyqqannan keıin Oljas Bektenov kásiporynnyń júktemesin odan ári ulǵaıtý qajettiligine nazar aýdardy, sondaı-aq ınvestıtsııa tartýǵa, qosymsha jumys oryndaryn qurýǵa jáne Stepnogor pen onyń mańynda tehnologııalyq órleýdi jedeldetýge yqpal etetin óndiris aınalasynda ónerkásip klasterin qurý keleshegin atap ótti.
Kásiporyn jumysymen tanysý barysynda qyzmetkerler aktıvimen kezdesý ótkizildi. Óndiristi tereńdetý, ótkizý naryǵyn ıgerý máseleleri talqylandy. Energııamen qamtamasyz etý deńgeıine jáne t. b. nazar aýdaryldy.
Premer-Mınıstr men úkimettik delegatsııa músheleri qajetti jaýaptaryn berip, túsindirme júrgizdi.
«Ónerkásipti damytý jáne jańa kásiporyndardy iske qosý úshin turaqty energııa berý mańyzdy. Biz óndirgennen qaraǵanda kóp tutynamyz, sondyqtan energııany satyp alýǵa májbúrmiz. Bul tapshylyq jyldan jylǵa únemi ósip otyrady. Bizge elektr energııasynyń senimdi kózderi qajet. Kún, sý, jel balamaly qýat kózderin damytýǵa bolady dep aıtatyndar bar, biz de ony damytyp jatyrmyz, biraq olar qajetti turaqtylyqty bermeıdi, tek qosymsha energııa kózine aınalýy múmkin. Atom energetıkasyn damytý energııa júıesiniń turaqtylyǵyn qamtamasyz ete alady. Sonymen qatar bizde shıkizat bar, kadrlar bar», — dep atap ótti Oljas Bektenov.
Energetıka mınıstri Almasadam Sátqalıev zamanaýı atom stansalary eń joǵary qaýipsizdik sharalaryna sáıkes salynyp jatqanyn aıtty.
Óz kezeginde kásiporyn ujymy Memleket basshysynyń Joldaýynda aıtylǵan, onyń ishinde bıznesti qoldaý, AES salý boıynsha júrgizilip jatqan jumystar men bastamalarǵa qoldaý bildirdi.
