Oljas Bektenov sport nysandarynyń maqsatty ári tıimdi jumysyn qatań baqylaýǵa alýdy tapsyrdy
ASTANA. KAZINFORM – Memleket bıznesten áleýmettik jáne sporttyq ınfraqurylymdy damytý baǵytynda jaýapty qadam kútedi. Bul týraly Úkimet otyrysynda Premer-mınıstr Oljas Bektenov aıtty.
- Árbir qazaqstandyqtyń ómir saltyna aınalýǵa tıis sporttyń damýy Memleket basshysynyń únemi nazarynda. Bul oraıda elimizdiń barlyq óńirinde sporttyq ınfraqurylym men buqaralyq sportty damytý baǵytynda júıeli jumys júrgizilip jatyr. Basty maqsat – halyqtyń dene shynyqtyrý jáne sportpen qamtylý deńgeıin arttyryp, kásipqoı sportshylardy daıarlaý úshin qajetti jaǵdaı jasaý. Barlyq óńirde sport ınfraqurylymyn birkelki damytyp, turǵylyqty jerlerge jaqyn sport alańdarynyń jelisin qurý qajet. Sondaı-aq klýbtar men sektsııalardy damytý jumystaryna basa mán berilýge tıis, - dedi Úkimet basshysy.
Osy oraıda Úkimet basshysy jańa nysandardyń qurylysymen qatar qoldanystaǵy sport nysandaryn tıimdi paıdalanýǵa da nazar aýdarý kerektigin basa aıtty.
- Máselen, Almaty oblysynyń Talǵar qalasynyń turǵyndary «Jastar» stadıony qańyrap bos tur, sporttyq is-sharalar ótkizilmeıdi, sektsııalar joq dep shaǵym aıtýda. Týrızm jáne sport mınıstrligi men ákimdikter sport nysandarynyń maqsatty ári tıimdi jumysyn qatań baqylaýǵa alsyn. Aıta keteıik, sońǵy jyldary sport nysandarynyń qurylysy qarqyndy júrip jatyr. Byltyrdyń ózinde 90 nysan boı kóterse, onyń 61-i – aýyldyq jerlerde salyndy. Bul – óte mańyzdy kórsetkish, - dedi Oljas Bektenov.
Premer-mınıstr bıyl taǵy 102 nysan paıdalanýǵa berilip, jumystar aıaqtalatynyn aıtty.
- Memlekettik shyǵyndardy ońtaılandyrý úshin ákimdikter bıýdjetten tys qarjy kózderin tartyp, úlgilik jobalardy belsendi paıdalanýǵa tıis. Memleket bızneske qoldaý kórsetip otyr, sondyqtan áleýmettik jáne sporttyq ınfraqurylymdy damytý baǵytynda jaýapty qadamdar kútedi, - dedi ol.
Aıta keteıik, Úkimet otyrysynda egin jınaý naýqany qorytyndylanyp, sporttyq ınfraqurylymdy damytý máselesi pysyqtaldy.