Oljas Bektenov soltústik óńirlerde astyq keptirý jumystaryn basty nazarda ustaýdy tapsyrdy
ASTANA. KAZINFORM – Búgin Úkimet otyrysynda Premer-mınıstr Oljas Bektenov astyq keptirý úshin qosymsha suıytylǵan gaz ben dızel otynyn bólýdi tapsyrdy.
- Memleket basshysy Qazaqstan halqyna Joldaýynda elimizdiń azyq-túlik ónimderimen ózin-ózi qamtamasyz etý deńgeıin arttyryp, ishki naryqtyń ımportqa táýeldiligin azaıtý jumystarynyń mańyzyn atap ótti. Osy strategııalyq mindetti iske asyrýǵa yqpal etetin basty sharttardyń biri – ol egin oraǵyn sapaly ótkizý. Úkimet tarapynan egis jumystaryn ońtaıly uıymdastyrý úshin barlyq qajetti jaǵdaı jasaldy. Aýqymdy qarajat bólindi. Sharýalardy materıaldyq-tehnıkalyq jaǵynan qamtamasyz etý sharalary qabyldandy. Endi alqap basyndaǵy jumystardy ýaqtyly aıaqtaý kerek. Bul – óte mańyzdy másele. Memleket basshysy ótken aptada eginshilermen bolǵan keńeste osyny erekshe atap kórsetti, - dedi Oljas Bektenov.
Úkimet basshysynyń aıtýynsha, qazirgi tańda elimiz aýmaǵynda egin jınaý jumystary belsendi júrip jatyr. Ońtústik óńirlerde aıaqtalýǵa jaqyn. Aldyn ala nátıjelerge oń baǵa berilip otyr.
- Al janarmaı máselesine kelsek, onyń barlyq qajetti kólemin qoldanystaǵy kestege sáıkes jetkizý kerek. Kúnniń jaýyn-shashyndy bolýy jáne kúrt sýytyp ketýi jumystyń merzimi men astyq sapasyna kesirin tıgizýi múmkin. E-Ótinish boıynsha osy máselege qatysty qazirdiń ózinde 500-ge jýyq ótinish kelip túsken. Ótinishterdiń eń kóbi – 300-den astamy Qostanaı oblysynyń fermerlerinen kelip otyr. Olar astyq keptirý jabdyqtaryn iske qosý jáne astyqty satyp alý baǵasyna qatysty shaǵym aıtýda. Sondaı-aq keptirý jabdyqtaryn gaz júıesine qosa almaı júr. Qostanaı oblysynyń ákimdigi men Aýyl sharýashylyǵy mınıstrligi bul máseleni sheshýge járdemdesýi qajet. Ákimdikterge Energetıka mınıstrligimen birlesip, aldyn ala málimdelgen suranysqa sáıkes astyq keptirý úshin qosymsha suıytylǵan gaz ben dızel otynyn bólýdi tapsyramyn. Jalpy soltústik óńirlerde astyq keptirý jumystaryn basty nazarda ustańyzdar, - dedi ol.
Úkimet basshysy aýa raıynyń buzylýy egin jınaý qarqynyna, astyqtyń sapasy men kólemine áser etpeýge tıistigin basa aıtty.
- Ekologııa mınıstrligi eginshilerge kúndelikti aýa raıy boljamy týraly aqparat berip tursyn, - dedi Oljas Bektenov.
Aıta keteıik, Ekologııa jáne tabıǵı resýrstar vıtse-mınıstri Nurken Shárbıev Úkimette egin jınaıtyn aımaqtardaǵy aýa raıy boljamyn baıandady.