Oljas Bektenov Société Générale banki ókilderimen elimizge qarjy tartý máselesin talqylady
ASTANA. KAZINFORM - Qazaqstan Premer-Mınıstri Oljas Bektenov halyqaralyq Société Générale bankiniń Taıaý Shyǵys, Túrkııa/TMD, Afrıka óńirindegi basshysy Emrık Arno jáne Ortalyq Azııa elderi men Kavkaz óńirindegi basshysy Teıba Gýlıevamen kezdesti.
Kezdesý barysynda ınvestıtsııalyq jobalardy iske asyrý aıasynda aǵymdaǵy ózara is-qımyl máseleleri talqylandy. 1864 jyly qurylǵan Société Générale – 66 elde ókildigi bar eń iri halyqaralyq qarjy ınstıtýttarynyń biri. Qazaqstan Úkimeti men Bank arasyndaǵy 30 jylǵy yntymaqtastyq barysynda quny $17 mlrd-tan asatyn 30-dan astam birlesken joba iske asyryldy.
Qazirgi ýaqytta birqatar qazaqstandyq kompanııalar Société Générale bankimen energetıkalyq ınfraqurylym jáne qarjy naryǵy salasyndaǵy jobalar boıynsha kelissózder júrgizýde. Sonymen qatar kezdesýge qatysýshylar ekonomıkanyń barlyq salalarynda ornyqty damýdy ıntegratsııalaý maqsatynda ESG (ekologııalyq orta, qoǵamdyq qyzmet, korporatıvtik basqarý) baǵyty boıynsha yntymaqtastyqty damytý perspektıvalaryn talqylady.
«Memleket basshysy Qasym-Jomart Toqaev atap ótkendeı, Qazaqstanǵa sheteldik ınvestıtsııalar aǵynyn qamtamasyz etý úshin halyqaralyq bankterdi belsendi túrde tartý qajet. Bul baǵytta Úkimet ózara tıimdi áriptestikke daıyn jáne elimiz úshin mańyzdy jobalardy iske asyrýǵa járdemdesetin bolady», — dep atap ótti Oljas Bektenov.
Memleket basshysynyń Qazaqstan halqyna Joldaýynda qoıylǵan mindetterdi oryndaý maqsatynda elimizde ekonomıkaǵa sheteldik kózderden, onyń ishinde qarjy sektoryndaǵy básekelestikti arttyrý úshin senimdi halyqaralyq bankterden qarjy tartý úshin qolaıly jaǵdaılar jasaý boıynsha sharalar kesheni iske asyrylýda. Júrgizilip jatqan jumystyń maqsaty – ekonomıkany nesıelendirýge belsendi qatysa alatyn halyqaralyq naryqta jumys tájirıbesi bar bankterdi Qazaqstanǵa tartý.
