Oljas Bektenov: Slovakııa — Qazaqstannyń Eýropalyq Odaqtaǵy senimdi seriktesi
ASTANA. KAZINFORM – Qazaqstan jáne Slovakııa premer-mınıstrleri saýda-ekonomıkalyq yntymaqtastyq máselelerin talqylap, birlesken bıznes-forýmǵa qatysty. Bul týraly Úkimettiń baspasóz qyzmeti habarlady.
Qazaqstan Respýblıkasynyń Premer-mınıstri Oljas Bektenov elimizge alǵashqy resmı saparymen kelgen Slovakııa Respýblıkasynyń Premer-mınıstri Robert Fıtsomen kezdesti.
Kezdesý barysynda saýda-ekonomıkalyq yntymaqtastyqty damytý máseleleri talqylandy.
— Slovakııa — Qazaqstannyń Eýropalyq Odaqtaǵy senimdi seriktesi. Qazaqstan Prezıdenti Qasym-Jomart Toqaev Slovakııa Respýblıkasymen jan-jaqty strategııalyq áriptestikti damytýǵa erekshe mán beredi. Bizdiń elderimizde ónerkásipti, aýyl sharýashylyǵyn, joǵary bilikti adamı kapıtaldy damytý, sondaı-aq qolaıly geografııalyq jaǵdaı salalarynda kóptegen uqsastyqtar bar. Munyń bári Qazaqstan — Slovakııa qatynastaryn odan ári nyǵaıtýǵa berik negiz bolady, —
dep basa aıtty Oljas Bektenov.
— Eki memlekettiń basshylary men premer-mınıstrler kezdesýleri — jobalardy júzege asyrýdyń jumyldyrýshy quramdas bóligi. Biz taýar aınalymyn arttyrýǵa ǵana emes, birlesken óndiris oryndaryn qurýǵa da múddelimiz, — dep atap ótti Robert Fıtso.
Ótken jyly eki el arasyndaǵy taýar aınalymy $140 mln, osy jyldyń 4 aıynda ózara saýda kólemi 46%-ǵa artty. Saýda qurylymyn ártaraptandyrý jáne taýarlar men kórsetiletin qyzmetter túrin odan ári keńeıtý sharalarynyń mańyzdylyǵy atap ótildi.
Qazaqstan organıkalyq óndiris salasynda birlesken kásiporyndar qurý jáne tájirıbe almasý, halyqaralyq naryqtarǵa turaqty shyǵýdy qamtamasyz etetin tıimdi kólik-logıstıkalyq baǵyttardy damytý arqyly aýyl sharýashylyǵy salasyndaǵy yntymaqtastyqty tereńdetýge múddeli.
Úkimetke otandyq tasymaldaýshylar tarapynan kelip túsken ótinishterdi eskere otyryp, Oljas Bektenov tranzıttik júk tasymaldaýǵa ruqsat berý kvotasyn odan ári ulǵaıtý máselesin qaraýǵa bastamashy boldy.
Taraptar jan-jaqty ózara tıimdi yntymaqtastyqty nyǵaıtýǵa jáne Robert Fıtsonyń Qazaqstanǵa resmı sapary barysynda qol jetkizilgen ýaǵdalastyqtardy tolyq júzege asyrýǵa nıetti ekenin jetkizdi.
Kelissózder qorytyndysy boıynsha premer-mınıstrler «Qazaqstan — Slovakııa» bıznes-forýmyna qatysty.
Eki eldiń isker toptarynyń ókilderi ózara qyzyǵýshylyq týdyratyn jańa salalar boıynsha qarym-qatynas ornatý máselelerin talqylady. Qazaqstanda slovak bıznesi densaýlyq saqtaý, energetıka, tamaq ónerkásibi jáne taǵy basqa salalarǵa belsendi túrde qatysyp jatyr.
Oljas Bektenov óz sózinde ınvestorlar men slovakııalyq isker top ókilderin jobalardy birlesip júzege asyrýǵa shaqyrdy. Ónerkásip, energetıka, aýyl sharýashylyǵy, áskerı-ónerkásiptik keshen sııaqty jáne basqa da yntymaqtastyq pen ekonomıkalyq damýǵa negiz bolatyn uzaqmerzimdi baılanystardy jandandyrýdyń perspektıvaly baǵyttary aıqyndaldy. Qazaqstan júzege asyryp jatqan Sý seriktestigi bastamasy aıasynda sý resýrstaryn basqarý salasynda tájirıbe almasý mańyzdy, soǵan sáıkes, sý sharýashylyǵy ınfraqurylymyn jańǵyrtý, zamanaýı ırrıgatsııalyq jáne taǵy basqa da júıelerdi engizý kózdelgen.
Sondaı-aq Qazaqstanda IT mamandar úshin jasalǵan jaǵdaıǵa nazar aýdaryldy. Astana Hub halyqaralyq tehnoparki búginde 1,5 myńnan astam startapty, onyń ishinde Google, Microsoft sııaqty basqa da álemdik tehnologııalyq kóshbasshylardy qoldaıdy. Slovakııanyń ınnovatsıalyq IT sektory tsıfrlyq ekojúıege negizdelgen startaptardy iske asyrýǵa shaqyryldy.
Forým jumysyn aıaqtaı otyryp, Qazaqstan men Slovakııa premer-mınıstrleri jan-jaqty ózara tıimdi áriptestikti sapaly túrde keńeıtýge berik ustanymdaryn bildirdi.
Aıta ketelik Qasym-Jomart Toqaev Slovakııa Premer-mınıstri Robert Fıtsomen kelissóz júrgizdi.