Oljas Bektenov iske asyrylý merzimi sozylyp ketken taza aýyz sý jobalaryn atady

ASTANA. KAZINFORM – Úkimet otyrysynda Premer-mınıstr Oljas Bektenov aýyl halqyn taza aýyz sýmen qamtýy tıis keıbir jobalardyń iske asyrylý merzimi sozylyp ketkenine nazar aýdartty.

- Mysaly, Soltústik Qazaqstan oblysynda Sokolov toptyq sý qubyryn jańǵyrtý jumystary jáne Aqmola oblysyndaǵy Talapker men Qajymuqan aýyldaryna deıin sý qubyryn tartý jobasy. Onyń sebebi nede jáne qandaı jumystar atqarylyp jatyr?, - dep surady Oljas Bektenov Sý resýrstary jáne ırrıgatsııa mınıstrinen.

Saýalǵa jaýap bergen Nurjan Nurjigitov onyń negizgi 2 sebebi bar ekenin aıtady. Birinshiden, jyldan jylǵa bıýdjet tarapynan qarjy tolyq kólemde bólinbeıdi. Ekinshiden, merdigerler jumysty sapasyz atqarady jáne ýaqytyly istemeıdi.

- Siz ataǵan 2 jobaǵa Ulttyq qordan 5,8 mlrd teńge bólindi. Bıyl arnaýly qordan qosymsha 5,5 berildi. Sokolov jobasy boıynsha qosymsha 600 mln teńge jetispeıdi. Merdigerlermen jumys istedik, kestege sáıkes júrgizilip jatyr. Bıyl kóp jumysty aıaqtaımyz. Kelesi jyly qabyldaý jumystaryn júrgizemiz, - dedi mınıstr.

- Qarajat bólindi, bárin tezdetý kerek. Ýaqytyly iske qosý qajet, - dep naqtylady Oljas Bektenov.

Aıta keteıik, Úkimet otyrysynda sý sharýashylyǵyna qatysty máseleler talqylanyp jatyr.