Oljas Bektenov syrtqy qaryz qandaı jobalarǵa tartylatynyn aıtty

ASTANA. KAZINFORM – Osy jyldyń 10 aıynda elimizdiń aqyly joldarynan bıýdjetke 72 mlrd teńge qarjy tústi. Bul týraly Senattyń jalpy otyrysynda Premer-mınıstr Oljas Bektenov aıtty.

- Qandaı jobalarǵa syrtqy qaryz tartylatyny mańyzdy másele. Meniń jáne Úkimettiń ortaq pikirine sáıkes, qaryz tartý tartymdy bolýy, negizinen paıdalanýǵa berilgennen keıin jobanyń kommertsııalyq turǵyda ózin-ózi aqtaýy, belgili bir nysan qurylysyna tartylǵan qaryzdy óteý úshin bıýdjetke belgili bir kiris ákelýi tıis. Mysalǵa joldardy keltireıin, bul halyqaralyq tájirıbe. Kóp jaǵdaıda, onyń ishinde Qazaqstanda da joldar syrttan qaryz tartý esebinen salynady. Qazir biz, Kólik mınıstrligi joldardy aqyly qylý úshin úlken jumys istep jatyr. Muny ne úshin isteý qajet? Biz salatyn, úlken qarajat jumsaıtyn joldardyń naqty qaıtarymy, qaryzdardy óteýge septigi tııýi tıis, - dedi Úkimet basshysy senatorlardyń saýalyna oraı.

Osy oraıda Premer-mınıstr elimizdegi aqyly joldardan túsken túsimdi naqty atady.

- Máselen, ótken jyly biz joldardan 48 mlrd teńge túsim aldyq. Onyń 10 mlrd teńgesi ınfraqurylymdarymyzdy paıdalanyp, elimiz arqyly ótetin tranzıttik sheteldik kólik quraldarynan tústi. Al osy jyldyń 10 aıynda 72 mlrd teńge, onyń ishinde sheteldik kólikterden 17 mlrd teńge aldyq. Bul jumysty jalǵastyramyz. Jalpy, jekelegen sholýshylar men sarapshylardyń bul máselege ústirt qarap, qansha qarjy tartqanymyzdy, jumsaǵanymyzdy ǵana aıtady. Biraq, syrtqy qaryz esebinen salynǵan belgili bir nysannyń ekonomıkamyzǵa qandaı tıimdiligi bar ekenin eskermeıdi, - dedi ol.

Oljas Bektenovtiń aıtýynsha, joǵary sanattaǵy magıstral salynǵan óńirdegi ekonomıkalyq belsendilik múldem ózgeshe bolady.

- Nege ekenin sol joldyń boıynda shartty túrde aıtqanda 50 janar-jaǵarmaı quıý stansasy, 100-degen jol boıyndaǵy dámhana salynatyndyǵyn eskermeıdi. Munyń bári ekonomıka, jumys orny, tólengen salyq jáne ekonomıkalyq ósim de. Eger mundaı ınfraqurylymdyq jobalarǵa qarjy quımasa, onda mundaı damýdyń bolmaıtyny sózsiz. Sondyqtan bizdiń paıymyzsha, aqylmen tartylǵan jáne jumsalǵan syrtqy qaryz ekonomıkalyq damý úshin tyń tıimdilik beredi. Árıne, biz mundaı qarajat qandaı jobalarǵa tartylatynyn jáne jumsalatyn muqııat qaraımyz, - dedi Úkimet basshysy.

Sonymen qatar ol memlekettik qaryz deńgeıi tómen bolýy tıis dep sanaımynyn aıtty.