Oljas Bektenov Shymkentte aýyl sharýashylyǵy, tamaq ári farmatsevtıka ónerkásibiniń damýymen tanysty
ShYMKENT. KAZINFORM — Qazaqstan Premer-Mınıstri Oljas Bektenov Shymkentke jumys sapary aıasynda aýyl sharýashylyǵyndaǵy óńdeý, farmatsevtıka jáne tamaq ónerkásibi salalarynyń ókilderimen kezdesti. Prezıdent Joldaýyndaǵy ónerkásiptik áleýetti tolyq ashý jáne ekonomıka ósiminiń jańa núktelerin damytý jónindegi mindetterdi iske asyrý barysy men sharalary talqylandy.
Premer-Mınıstr qalanyń ónerkásiptik áleýetimen tanysty. «Hımfarm» farmatsevtıkalyq zaýytynyń aýmaǵynda Úkimet basshysyna óndiristik qýattar jyl saıyn 1 mlrd birlikke deıin tabletkalar, kapsýlalar men túıirshikter, 250 mln ampýla ınektsııalyq eritindiler jáne basqasyn shyǵarýǵa múmkindik beretini baıandaldy. Farmatsevtıkalyq kásiporyn 89 atalym boıynsha dárilik zattardy jetkizedi. Qalanyń farmatsevtıka salasynda kásiporynnyń úlesi 99,2%-dy, respýblıka boıynsha — 43%-dy quraıdy. Kásiporynda 897 adam jumys isteıdi. Qyzmetkerler Eýropa elderinde únemi beıindik oqytýdan jáne biliktiligin arttyrýdan ótedi.
Úkimet basshysy farmatsevtıka ónerkásibindegi otandyq óndiristiń úlesin odan ári arttyrýdyń mańyzyn atap ótti.
Shymkent qalasynyń Altyntóbe eldimekenindegi «Alan jáne Kompanııa» djem men shyryn óndiretin kásipornyna barǵan kezde zaýyt saǵatyna 7 tonnaǵa deıin kókónis pen jemisterdi óńdeýge múmkindik beretin zamanaýı jabdyqtarmen jabdyqtalǵany baıandaldy. 45 gektar jerge tamshylatyp sýarý júıesi ornatylǵan, alma, shabdaly, almurt jáne júzim ósiriledi. Kompanııaǵa «Investıtsııalyq salymdar kezinde AÓK sýbektisi shekken shyǵystardyń bir bóligin óteý boıynsha sýbsıdııalaý» baǵdarlamasy sheńberinde memlekettik qoldaý kórsetildi.
«Importty almastyrý maqsatynda 2024-2028 jyldarǵa arnalǵan aýyl sharýashylyǵy ónimderin qaıta óńdeýdi damytý jónindegi keshendi josparǵa salanyń básekege qabilettiligin arttyrý jónindegi qadamdar engizildi. Ol úshin qaıta óńdeý kásiporyndaryn sapaly shıkizatpen qamtamasyz etý, saqtaý syıymdylyqtary men tehnologııalyq jabdyqtardy jańǵyrtý úshin ınvestıtsııalardy belsendi tartý, sondaı-aq qosymsha óndiristik qýattardy qurý kózdelgen. Premer-Mınıstr atalǵan sharalar salaǵa eleýli qoldaý kórsetetinin jáne otandyq qaıta óńdelgen ónimder óndirisin ulǵaıtýǵa yqpal etetinin atap ótti. Bul ishki naryqty toltyrýǵa jáne ımportty almastyrý máselelerin sheshýge múmkindik beredi», — delingen habarlamada.
Jumys sapary barysynda Úkimet basshysy The Coca-Cola Company saýda belgileri bar alkogolsiz sýsyndar shyǵaratyn jańa zaýytpen tanysty. «Koka Kola Almaty Bottlers» birlesken kásiporny Shymkent qalasyndaǵy saýda-logıstıkalyq ortalyqtyń aýmaǵynda ornalasqan. Kásiporyn gazdalǵan, gazdalmaǵan sýsyndar men bótelkedegi sýdy óndiredi, zaýyttyń qýaty — jylyna 283 mln lıtr. 100 jumys ornyn ashatyn jobadaǵy ınvestıtsııa somasy 27 mlrd teńgeni quraıdy.
Premer-Mınıstr jergilikti jerlerde ınvestorlarǵa kórsetiletin qoldaý sharalaryna, sondaı-aq olar shyǵaratyn ónimniń sapasyn únemi arttyrýdyń mańyzyna nazar aýdardy. Prezıdenttiń Qazaqstan halqyna Joldaýynda qoıylǵan mindetterdi iske asyrý aıasynda damýdyń ary qaraıǵy keleshegine nazar aýdaryldy.
«Memleket basshysy Úkimet pen ákimderge ekonomıkanyń qurylymyn ózgertý máselesine erekshe nazar aýdarýdy, elimizdiń ornyqty ilgerileýin qamtamasyz etýge baǵyttalǵan jańa tetikterdi qarastyrýdy tapsyrdy. Jeke ınvestıtsııalardy tartý mańyzdy. Jańa kásiporyndar ashylady, óıtkeni bul ekonomıkalyq turǵydan tıimdi. Sonymen birge ónerkásiptiń áleýetin odan ári ashý qajet. Bizdiń aldymyzda óńdeý úlesin 70%-ǵa deıin jetkize otyryp, bastapqy óndiristen joǵary deńgeıde óńdelgen ónimder shyǵarýǵa kóshý mindeti tur. Úkimet óz kezeginde ınvestorlarǵa el ekonomıkasy úshin mańyzdy jobalardy iske asyrýda qoldaý kórsetedi», — dep atap ótti Oljas Bektenov.
Premer-Mınıstr bıznesti qoldaýdyń qoldanystaǵy sharalarynyń tıimdiligi men naqtylyǵyn odan ári kúsheıtýdiń mańyzyna nazar aýdardy. Óz kezeginde bıznesten ekologııany qorǵaýǵa, mektepter men balabaqshalardy jáne basqa da áleýmettik nysandardy abattandyrýǵa, jańǵyrtýǵa úles qosatyn áleýmettik jaýapkershilik kútiledi.
