Oljas Bektenov sheteldik ınvestorlarmen keleshegi zor jobalardy talqylady
ASTANA.KAZINFORM - Premer-mınıstr Oljas Bektenov Sheteldik ınvestorlar keńesi qatysýshylarymen kezdesý barysynda Prezıdent belgilegen ınvestıtsııalyq yntymaqtastyqtyń keleshegi zor baǵyttaryn talqylady.
Premer-mınıstr Oljas Bektenov Memleket basshysynyń tóraǵalyǵymen ótken Sheteldik ınvestorlar keńesiniń 37-shi plenarlyq otyrysy aıasynda otyrysqa qatysýshylar – sheteldik kompanııalar men iri qarjy uıymdary basshylarymen birqatar kezdesý ótkizdi.
Sheteldik ınvestorlar keńesi otyrysynda Prezıdent Qasym-Jomart Toqaev atap ótken yntymaqtastyqtyń keleshegi zor baǵyttary jáne birlesken ınvestıtsııalyq jobalardy júzege asyrý barysyna nazar aýdaryldy. Qazaqstan Úkimeti ónerkásip jáne metallýrgııa salasyndaǵy, onyń ishinde tereń óńdeý, kólik ınfraqurylymyn jańǵyrtý, tsıfrlandyrý jáne JI, aýyl sharýashylyǵy salasyndaǵy bıznes bastamalardy quptaıdy jáne ekonomıkanyń ósýine baǵyttalǵan jobalarǵa qajetti qoldaý kórsetedi.
Solidcore Resources plc bas atqarýshy dırektory Vıtalıı Nesıspen kezdesý barysynda baǵaly jáne tústi metaldardy óndirý jáne qaıta óńdeý, energetıka jáne qorshaǵan ortany qorǵaý salasyndaǵy yntymaqtastyq máseleleri talqylandy. Pavlodar oblysynda gıdrometallýrgııa kombınatyn (EGMK) salý jobasyn júzege asyrýǵa nazar aýdaryldy. Solidcore Resources plc kompanııasynyń jobaǵa ınvestıtsııasy $978 mln-dy quraıdy, TMK qýaty – quramynda 300 myń tonna altyny bar kontsentratty qaıta óńdeý jáne jylyna shamamen 15 tonna altyn shyǵarý. Óńirde 500-ge jýyq jańa jumys ornyn ashý kózdelgen.
Kompanııanyń Soltústik Qazaqstan oblysyndaǵy Syrymbet qalaıy ken ornynda jáne Qostanaı oblysyndaǵy Toqtar altyn ken ornynda óndiris qýatyn jańǵyrtý jáne arttyrý josparlaryna nazar aýdaryldy. Atalǵan jobalardy júzege asyrý qosylǵan qunnyń ulǵaıýymen qaıta bólýdi arttyrýdy qamtamasyz etedi, bul Qazaqstan ekonomıkasyna qosymsha serpin beredi. Sonymen qatar Varvarın ken ornynda kún jáne gaz porshendi stansalary men gaz taratý ınfraqurylymy kesheni bar energetıkalyq klaster qurý boıynsha belsendi jumystar júrgizilýde.
Oljas Bektenov óndiristi keńeıtýge, zamanaýı tehnologııalardy engizýge jáne qorshaǵan ortany qorǵaýǵa baǵyttalǵan bıznes bastamalardyń mańyzdylyǵyn atap ótti. Úkimet tarapynan mundaı jobalarǵa jan-jaqty qoldaý kórsetiledi.
Solidcore Resources plc bas atqarýshy dırektory Vıtalıı Nesıs óz kezeginde Qazaqstanda metaldardy barlaý, óndirý jáne óńdeýdi qamtıtyn tolyq tsıkldi kásiporyndardy damytý úshin jasalǵan qolaıly jaǵdaı týraly aıtty.
Aıta keteıik, Prezıdent Úkimetke mobıldi operatorlardyń jaýapkershiligin kúsheıtýdi tapsyrdy.