Oljas Bektenov shekaralyq jáne toraptyq stantsııalarda júkterdi óńdeý ýaqytyn qysqartýdy tapsyrdy
ASTANA. KAZINFORM — Kólik mınıstrligi bir aı merzimde shekaralyq jáne toraptyq stantsııalarda júkterdi óńdeý ýaqytyn qysqartatyn qosymsha sharalar ázirleýi qajet. Bul týraly Úkimet otyrysynda Premer-mınıstr Oljas Bektenov aıtty.
— Temirjol salasynda túpkilikti tsıfrlyq sheshimderdi engizýdi jalǵastyrý qajet. Kólik mınıstrligine «Qazaqstan temir joly» kompanııasymen jáne múddeli memlekettik organdarmen birlesip, bir aı merzimde shekaralyq jáne toraptyq stantsııalarda júkterdi óńdeý ýaqytyn qysqartý, jumys kesteleriniń boljamdylyǵy men júk jóneltýshiler úshin qolaıly jaǵdaıdy qamtamasyz etý boıynsha qosymsha sharalar ázirleýdi tapsyramyn, — dedi Úkimet basshysy.
Oljas Bektenov Memleket basshysynyń tapsyrmasyna sáıkes, jeltoqsan aıynda memlekettik shekara arqyly ótkizý pýnktterin jańǵyrtý jumystary aıaqtalatynyn, jaqyn arada 5 ótkizý pýnkti iske qosylatynyn aıtty.
— Osylaısha, Eýrazııalyq ekonomıkalyq odaqtyń syrtqy kontýryndaǵy barlyq ótkizý pýnktteri halyqaralyq standarttarǵa saı bolyp, júkterdiń jyldam ótýin qamtamasyz etedi. Bul rette ishki kontýrda Kólik mınıstrligi «QazAvtoJol» kompanııasymen birge jumys qarqynyn jedeldetip, ótkizý pýnktteriniń qurylysyn belgilengen merzimde aıaqtaýy qajet. Bul másele meniń tikeleı baqylaýymda, — dedi ol.
Úkimet basshysy kólik joldarynyń boıyndaǵy servıstik ınfraqurylymnyń jaı-kúıi de mańyzdy másele ekenine nazar aýdartty.
— Kólik mınıstrligi «QazAvtoJol» kompanııasymen jáne óńir ákimdikterimen birlesip, halyqqa jáne jalpy tasymaldaýshylar úshin qolaıly jaǵdaı jasaýy qajet. Bul rette jeke ınvestıtsııalardy belsendi tartý kerek, — dedi Premer-Mınıstr.
Aıta keteıik, Úkimet otyrysynda elimizdiń kólik-tranzıt salasyn damytý men tsıfrlandyrý máselesi talqylandy.