Oljas Bektenov senatorlardyń AES-ti Kýrchatovta salý usynysyna jaýap berdi
ASTANA. KAZINFORM – Premer-Mınıstr Oljas Bektenov Senattyń bir top depýtatynyń Atom elektr stansasyn Kýrchatovta salý usynysyna jaýap berdi.
- Atom salasyn damytý máseleleri jónindegi vedomstvoaralyq komıssııanyń sheshimine sáıkes, Atom elektr stansasy qurylysy úshin oryndy Almaty oblysynyń Jambyl aýdanyna qarasty Úlken aýylyna taqaý aýdan belgilendi, - dedi Úkimet basshysy jaýabynda.
Aıta keteıik, qarasha aıynyń basynda Abaı oblysynyń Kýrchatov qalasynda Senattyń Halyqaralyq qatynastar, qorǵanys jáne qaýipsizdik komıtetiniń radıatsııalyq jáne seısmıkalyq qaýipsizdik máseleleri jónindegi kóshpeli otyrysy ótip, strategııalyq mańyzy bar obektilerdiń qorǵanysy talqylandy.
Osy kóshpeli otyrystan keıin senator Andreı Lýkın Úkimet basshysynyń atyna joldaǵan depýtattyq saýalynda ıAdrolyq ǵylym ortalyǵy sanalatyn Kýrchatov qalasynyń problemalary týraly másele kóterdi.
- Kýrchatov qalasyna ǵylymı qalashyq mártebesin berý máselesi kóptegen jyldar boıy kóterilip keledi. 2012 jyly Premer-Mınıstrdiń ókimimen ǵylym qalashyǵy týraly zańnamany ázirleý boıynsha usynys daıyndaý maqsatynda jumys toby qurylǵan bolatyn. Sonymen qatar, «Kýrchatov ǵylymı qalashyǵy» klasteriniń tujyrymdamasy jáne «Ǵylymdy qajet etetin aýmaqtar týraly» zań jobasy da ázirlendi. Shyn máninde, Kýrchatovtyń ǵylymı qalaǵa aınalýyna barlyq negiz bar, biraq másele búgingi kúnge deıin sheshilgen joq. «Ǵylym týraly» arnaıy zańnyń qabyldanýy Kýrchatov qalasynyń ózin de, onda ornalasqan ǵylymı ortalyqtardy da damytýǵa qýatty serpin beredi dep senemiz. Osylaısha, elimizdiń Prezıdenti Qasym-Jomart Toqaevtyń Qazaqstan halqyna Joldaýynda aıtylǵan «monoqalalarǵa dem berý» jáne «óńirlerdi belsendi damytý» týraly tapsyrmasyn oryndaýǵa múmkindik beredi, - dedi senator Lýkın.
Sondaı-aq ol bir top senatordyń atynan AES-ti Kýrchatov qalasynda salý múmkindigin qarastyrýdy usynǵan bolatyn.