Oljas Bektenov sarapshylarmen ekonomıkanyń damý máselelerin talqylady

ASTANA. KAZINFORM - Premer-mınıstr Oljas Bektenov sarapshylarmen ótkizgen kezdesýde ekonomıkany damytýdyń ózekti máseleleri talqylandy, dep habarlaıdy Úkimettiń baspasóz qyzmeti.

Ekonomıster álem naryǵyndaǵy qazirgi ahýal týraly saraptamalyq pikirlerimen bólisti, sondaı-aq ulttyq ekonomıkaǵa áser etetin úrdisterdi atap ótip, ekonomıkalyq ósýdi qamtamasyz etý boıynsha aldaǵy jumystarǵa qatysty birqatar usynys bildirdi.

Investıtsııa, saýda jáne óńdeý ónerkásibi salalaryna nazar aýdaryldy. Sonymen qatar Úkimettiń tıimdilikke basa nazar aýdara otyryp, basymdyq berilmegen shyǵystardy ońtaılandyrý jáne qarajatty mańyzdy baǵyttarǵa qaıta bólý jónindegi qyzmeti qaraldy.

Talqylaý qorytyndysy boıynsha Premer-mınıstr Ulttyq ekonomıka mınıstrligine aıtylǵan usynystardy pysyqtaýdy tapsyrdy.

Osyǵan deıin Úkimettiń 2027 jylǵa qaraı statıstıkalyq esepterdiń sanyn 50% qysqartatyny týraly jazdyq.