Oljas Bektenov Santıago de Gomar Rokamen Qyzylorda oblysyndaǵy zaýyt qurylysyn talqylady
ASTANA. KAZINFORM – Premer-mınıstr Oljas Bektenov Roca Group dırektorlar keńesiniń tóraǵasy Santıago de Gomar Rokamen kezdesý ótkizdi. Onda Qyzylorda oblysynda santehnıkalyq zaýyt salý jobasyn júzege asyrý máseleleri men ınvestıtsııalyq yntymaqtastyqty odan ári nyǵaıtý perspektıvalary talqylandy. Bul týraly Úkimettiń baspasóz qyzmeti habarlady.
Joba qýaty jylyna 500 myń buıymǵa deıin sanıtarlyq-tehnıkalyq ónimder shyǵaratyn joǵary tehnologııalyq zaýyt salýdy kózdeıdi. Óndiris Qyzylorda oblysyndaǵy «Óndiris» ındýstrııalyq aımaǵynda ornalasady, osy maqsattar úshin jer telimi belgilendi. Kásiporyn ónimderi ishki naryqqa jáne Ortalyq Azııa elderine eksportqa shyǵarýǵa baǵyttalǵan. Jalpy ınvestıtsııa kólemi €70 mln dep baǵalanady. Joba 300-ge jýyq jańa jumys ornyn ashýǵa múmkindik beredi.
Roca Group dırektorlar keńesiniń tóraǵasy Santıago de Gomar Roka kompanııa Qazaqstandy óńirdegi bıznesti damytýdyń strategııalyq alańy retinde qarastyratynyn atap ótti. Búgingi tańda Roca Group saladaǵy álemdik kóshbasshylardyń biri sanalady. Kompanııanyń 78 zaýyty, 20 myńnan astam qyzmetkeri bar.
– Qazaqstan – Ortalyq Azııadaǵy qatysýymyzdy keńeıtý úshin qısyndy tańdaý. Biz eldi búkil aımaq úshin tıimdi jumys isteı alatyn ónerkásiptik jáne logıstıkalyq hab retinde qarastyramyz. Elde óndiristi damytýǵa qolaıly jaǵdaı jasalǵan jáne Qyzylorda oblysyndaǵy joba jergilikti ekonomıkanyń damýyna úles qosa otyryp, halyqaralyq strategııamyzdyń mańyzdy bóligine aınalatynyna senimdimiz, - dedi Santıago de Gomar Roka.
Premer-mınıstr Oljas Bektenov ónerkásiptik óndiristi lokalızatsııalaý Úkimettiń ekonomıkany qurylymdyq nyǵaıtý jónindegi basym mindeti ekenin atap ótti. Osyǵan baılanysty Qazaqstan jaqsy ınvestıtsııalyq ahýal qalyptastyrý boıynsha belsendi jumys júrgizip jatyr.
– Qazaqstan Prezıdenti Qasym-Jomart Toqaevtyń ekonomıkalyq turaqtylyqty qamtamasyz etýdegi basym baǵyty aıasynda otandyq óndiristi qoldaýǵa jáne syrtqy jetkizilimderge táýeldilikti azaıtýǵa baǵyttalǵan ımportty almastyrý saıasaty belsendi damyp keledi. Qazaqstan men Ispanııa – strategııalyq seriktester. Sondyqtan biz kompanııany senimdi seriktes retinde kóremiz jáne tereń ındýstrııalyq damý úshin joǵary tehnologııalyq óndiris tartýdy quptaımyz. Úkimet jobanyń sátti júzege asýy úshin qajetti kómek kórsetedi, - dep atap ótti Oljas Bektenov.
Kezdesý sońynda taraptar QR Ónerkásip jáne qurylys mınıstrligi, Qyzylorda oblysynyń ákimdigi jáne Roca Group arasyndaǵy ınvestıtsııalyq jobany júzege asyrý qaǵıdattary týraly negizdemelik kelisimge qol qoıdy.
Aıta keteıik, otandyq ǵalymdar Qyzylordaǵa tózimdi kúrishtiń 2 túrin ázirlep jatyr.