Oljas Bektenov «Samuryq-Qazynanyń» satyp alýyndaǵy el ishindegi múmkindikter úlesin arttyrýdy tapsyrdy
ASTANA. KAZINFORM - Qazaqstan Premer-Mınıstri Oljas Bektenov iri ınvestıtsııalyq jobalardy iske asyrý máseleleri boıynsha «Samuryq-Qazyna» ulttyq ál-aýqat qory» AQ Dırektorlar keńesiniń otyrysyn ótkizdi. Bul týraly Úkimettiń baspasóz qyzmeti habarlady.
Munaı-gaz, munaı hımııasy, energetıka, kólik-logıstıka, taý-ken sektorlaryndaǵy jobalardyń qazirgi jaǵdaıy qaraldy. Strategııalyq mańyzy bar bastamalar tizbesine jıyntyq somasy 26,9 trln teńge bolatyn 44 joba kiredi, olardyń 11-i boıynsha qurylys-montaj jumystary júrgizilip jatyr.
Atalǵan jobalardy iske asyrý nátıjesinde Qazaqstanda qurylys kezeńinde 53 myńnan astam jumys orny jáne paıdalaný kezeńinde shamamen 11 myń jumys orny ashylatyn bolady.
Ekonomıka úshin basym jobalardy qarjylandyrý kólemin ulǵaıtýǵa erekshe nazar aýdaryldy. Bıyl 105,1 mlrd teńge obektilerdi gazdandyrýǵa, 272 mlrd teńge jalǵa beriletin turǵyn úı salýǵa, 680 mlrd teńgeden astam soma ınvestıtsııalyq jobalardy iske asyrýǵa baǵyttalatyn bolady. Budan basqa, «Samuryq-Qazyna» Ekibastuz GRES-2-ni keńeıtý jáne rekonstrýktsııalaýǵa, «Taldyqorǵan – Úsharal» magıstraldy gaz qubyry men «Darbaza – Maqtaaral» temirjol jelisin salý úshin qarajat tartýǵa nıetti.
Qor Qashaǵan ken ornynda qýaty 1 mlrd m3 bolatyn gaz óńdeý zaýytyn salýdy jalǵastyryp keledi. Ondaǵy maqsat – shıki munaı óndirýdi ulǵaıtý jáne shıki ilespe tabıǵı gazdy utymdy paıdalaný. Sondaı-aq munaı-gaz hımııasy salasyn odan ári damytý – polıetılen shyǵarý jónindegi gaz-hımııa keshenin jáne polıetılen shyǵaratyn zaýytty shıkizatpen qamtamasyz etý úshin gaz bólý keshenin salý josparda bar.
Úkimet basshysy qor ekonomıkasyn ártaraptandyrýdyń mańyzdylyǵyn atap ótip, barlyq erkin ótimdilikti strategııalyq mańyzdy jobalardy iske asyrýǵa jáne negizgi salalardy qoldaýǵa baǵyttaýdy tapsyrdy.
Oljas Bektenov qordyń satyp alýyndaǵy el ishindegi múmkindikter úlesin 88%-ǵa deıin arttyrýdy tapsyrdy (2024 jylǵy 5 aıdyń qorytyndysy boıynsha ıgerýdegi jergilikti qamtý úlesi – 61%).
Aıta keteıik, bıylǵy qańtar-maýsym aılarynyń derekteri boıynsha otandyq óndirýshilermen jasalǵan kelisimshart sany ótken jyldyń kórsetkishterimen salystyrǵanda 2 ese artqan.
