Oljas Bektenov «Samuryq-Qazyna» iri jobalarynyń oryndalý merzimin synǵa aldy
ASTANA. KAZINFORM — Premer-mınıstr Oljas Bektenov «Samuryq-Qazyna» qorynyń iri ınvestıtsııalyq jobalaryn júzege asyrý merzimderiniń buzylýyna syn aıtty. Ol qor men enshiles kompanııalar basshylyǵyna jobalardyń ýaqytyly aıaqtalýyn baqylaýdy kúsheıtýdi tapsyrdy.
«Samuryq-Qazyna» AQ dırektorlar keńesi otyrysynda Qordyń 2026 jylǵy 9 aıdaǵy qyzmetiniń qorytyndylary, onyń ishinde, negizgi qarjylyq jáne óndiristik kórsetkishter, otandyq taýar óndirýshilerdi qoldaý sharalary qaraldy. Prezıdent Qasym-Jomart Toqaevtyń «Jańa tarıhı kezeńdegi Qazaqstannyń ózekti mindetteri» atty Joldaýynda iri ınvestıtsııalyq jobalardyń ýaqtyly júzege asyrylýyn qamtamasyz etý jónindegi mindetterine nazar aýdaryldy.
Qordyń basqarma tóraǵasy Nurlan Jaqypov esepti kezeńdegi qyzmet nátıjeleri týraly baıandady. Qor kirisi 13%-ǵa, al taza paıdasy 19%-ǵa ósken. Negizgi óndiristik kórsetkishter boıynsha jospar oryndaldy.
Sonymen qatar dırektorlar keńesine jalpy quny 43,8 trln teńgeni quraıtyn 69 iri ınvestıtsııalyq jobanyń júzege asyrylý barysy týraly aqparat usynyldy. Investıtsııalardyń basym bóligi munaı-gaz ónerkásibine, munaı-gaz hımııasy jáne dástúrli elektr energııasyn óndirý salasyna baǵyttalǵan. Sondaı-aq gaz tasymaldaý, energetıkalyq ınfraqurylymdy damytý, kólik, kommýnıkatsııa jáne basqa da baǵyttar qamtylady. Búgingi tańda 44 joba boıynsha qurylys-montaj jumystary júrgizilip jatsa, qalǵandary júzege asyrýdyń túrli kezeńderinde ekeni aıtyldy.
Qordyń negizgi jobalarynyń biri retinde bıylǵy qazan aıynda iske qosylǵan Qazaqstan men Ázerbaıjan arasyndaǵy halyqaralyq derekter almasý múmkindikterin keńeıtýge jáne eki eldiń tsıfrlyq baılanysyn nyǵaıtýǵa baǵyttalǵan uzyndyǵy 380 shaqyrym bolatyn talshyqty-optıkalyq baılanys jelisi atalyp otyr. Sondaı-aq Qordyń Gonkong qor bırjasynda jáne «Astana» halyqaralyq bırjasynda 3 mlrd ıýan somasyndaǵy ıýanmen nomınatsııalanǵan oblıgatsııalaryn alǵash ret ornalastyrýy atap ótildi. Bul qadam halyqaralyq kapıtal naryqtaryna qoljetimdilikti arttyryp, el ekonomıkasyna qosymsha ınvestıtsııalar tartýǵa serpin beredi. Kólik áleýetin damytýdyń mańyzdy kezeńi
Darbaza – Maqtaaral jańa temirjol jelisi boıynsha qozǵalysty iske qosý. Osy jyldyń qazan aıynda bul baǵyt boıynsha qazaqstandyq kómirmen Ózbekstanǵa alǵashqy júk poıyzy jóneltildi. Magıstraldy iske qosý temir jol jelisiniń ótkizý qabiletin edáýir keńeıtýge, júk tasymaldaý kólemin ulǵaıtýǵa jáne qazaqstandyq ónimdi Ortalyq Azııa elderine eksporttaý úshin qosymsha joldar ashýǵa múmkindik beredi.
Otandyq óndirýshilerdi qoldaý jónindegi jumys sheńberinde Qordyń qazaqstandyq kompanııalardan 9 aıda satyp alý kólemi shamamen 1,4 trln teńgeni qurady, bul ótken jyldyń sáıkes kezeńimen salystyrǵanda 45%-ǵa artyq. Esepti kezeńde ofteık-kelisimsharttardyń kólemi 73 mlrd teńge boldy. Sonymen qatar jańa áleýmettik nysandardyń qurylysy jalǵasýda. 2027–2028 jyldary Astana, Túrkistan jáne Petropavl qalalarynda birqatar iri medıtsınalyq nysandy aıaqtaý, sondaı-aq ınklıýzıvti sport, ońaltý, bilim berý jáne mádenıet salasyndaǵy jobalardy júzege asyrý josparlanyp otyr.
Otyrys qorytyndysy boıynsha Premer-mınıstr ınvestıtsııalyq jobalardy júzege asyrý merzimderin buzý faktilerine jol bergeni úshin Qor men enshiles kompanııalardyń basshylyǵyn synǵa alyp, belgilengen merzimderdiń saqtalýyn baqylaýdy kúsheıtýdi, sondaı-aq olardy júzege asyrý sheńberinde satyp alynatyn taýarlardaǵy, jumystar men kórsetiletin qyzmetterdegi jergilikti qamtý úlesin ulǵaıtý jumystaryn jalǵastyrýdy tapsyrdy. Budan bólek, júzege asyrylyp jatqan jobalardy, onyń ishinde Túrkistan, Qyzylorda, Almaty jáne Ekibastuz qalalarynda óndirýshi qýattardy iske qosý, gaz óńdeý zaýyttaryn salý jónindegi jobalardy ýaqtyly paıdalanýǵa berýdi kúsheıtilgen baqylaýǵa alý tapsyryldy.
