Oljas Bektenov «Samuryq-Qazyna» qory dırektorlar keńesiniń otyrysyn ótkizdi

ASTANA.KAZINFORM — Premer-mınıstr Oljas Bektenov «Samuryq-Qazyna» ulttyq ál-aýqat qory» AQ dırektorlar keńesiniń otyrysyn ótkizdi. Bul týraly Úkimettiń baspasóz qyzmeti habarlady.

Negizgi mindet – qor kompanııalary tobynyń mysalynda Memleket basshysynyń ekonomıkany yryqtandyrý jónindegi tapsyrmalarynyń oryndalýyn qadaǵalaý. Qordyń basqarma tóraǵasy Nurlan Jaqypov bıylǵy 11 aıdaǵy óndiristik jáne qarjylyq kórsetkishter boıynsha baıandama jasady.

Qazirgi ýaqytta «Samuryq-Qazyna» AQ kompanııalar tobynyń ınvestıtsııalyq portfeli jalpy somasy 53,5 trln teńge bolatyn 130-ǵa jýyq jobany qamtıdy. Úkimettiń erekshe baqylaýynda turǵan 44 ınvestıtsııalyq iri jobanyń iske asyrylý barysy qaraldy. Atalǵan jobalarǵa munaı-gaz, munaı hımııasy, energetıka, kólik-logıstıka jáne taý-ken sektorlaryndaǵy salynǵan qarjynyń jalpy kólemi – 28,8 trln teńge.

Búgingi tańda 23 joba boıynsha ERS-kelisimsharttar jasaldy, bul rette 15 joba boıynsha qurylys-montajdaý jumystary júrgizilip jatyr. Qalǵandary iske asyrýdyń túrli kezeńderinde.

Qordyń basqarma tóraǵasy Nurlan Jaqypov «Taldyqorǵan – Úsharal» magıstraldy gaz qubyryn salý jobasy boıynsha josparlanǵan 302 shaqyrymdyq gaz qubyrynyń 95,5 shaqyrymy tartylǵanyn, jumystar merziminen buryn júrgizilip jatqanyn baıandady.

«Dostyq – Moıynty» temirjol dálizin jańǵyrtý aıasynda josparlanǵan 836 shaqyrym joldyń 786 shaqyrymy salyndy, bul da osy kezeńdegi josparly kórsetkishterden asyp tústi. SIBÝR jáne Sinopec «Polıetılen óndirisi» kompanııalarymen birlesken jobany júzege asyrý sheńberinde ınjenerlik daıyndyq júrgizilip jatyr.

Prezıdenttiń birlesken ınvestıtsııalaý quraldaryn keńinen qoldaný jónindegi tapsyrmasyn oryndaýda áleýmettik mańyzǵa ıe jobalardy iske asyrý úshin jekemenshik kompanııalar qarajatyn tartý jumystary jalǵasyp jatyr. Osylaısha, Qyzylorda oblysynda elektr stansasyn salý sheńberinde 2024 jyly «Samuryq-Energo» AQ men qatarlyq ınvestor PIH arasynda qýaty 1 GVt jel elektr stansalaryn iske qosý jobasyn birlesip júzege asyrý týraly – Masdar (BAÁ) kompanııasymen birlesken joba boıynsha ınvestıtsııalyq kelisimge qol qoıyldy. Sondaı-aq Shymkent pen Batys Qazaqstan oblysynda áleýmettik jaǵynan az qorǵalǵan otbasylarǵa gazben jabdyqtaý tarıfin túzetý máselelerinde qoldaý kórsetý úshin «Áleýmettik ámııan» pılottyq jobasynyń iske qosylýyna nazar aýdaryldy. Bul bastama ataýly áleýmettik jáne turǵyn úı kómegin alatyn azamattardy qamtıdy.

Olar úshin taýarlyq gazǵa jeńildik mólsheri eseptelgen somanyń 24%-na jetýi múmkin. Qordyń basqarma tóraǵasy Nurlan Jaqypov «Samuryq-Qazyna» AQ satyp alýlarynda otandyq taýar óndirýshilerdi qoldaý boıynsha júzege asyrylyp jatqan sharalar týraly esep berdi. Osy jyldyń 11 aıynda ofteık-kelisimsharttar somasy 2023 jyldyń sáıkes kezeńimen salystyrǵanda 12 ese ósip, 182,3 mlrd teńgege jetti. OTÓ-men jalpy 1 trln teńgeden astam somaǵa shart jasaldy, ótken jylmen salystyrǵanda ósim 83%-dy qurady.

Bıylǵy qarasha aıynda josyqsyz áleýetti ónim berýshiler tarapynan zańsyz qujattardy tirkeý múmkindigin joıý maqsatynda QR QM MKK elektrondy shot-faktýralardyń aqparattyq júıesimen ıntegratsııalaý qamtamasyz etildi. Premer-mınıstrdiń elishilik qundylyq úlesin 82%-ǵa jetkizý jónindegi tapsyrmasyna sáıkes, josparly kórsetkishke 2024 jyldyń sońyna qaraı qol jetkiziledi dep kútilip otyr.

Premer-mınıstrge munaı-gaz-hımııasy, elektr energetıkasy, kólik-logıstıka, taý-ken, telekommýnıkatsııa sektorlaryndaǵy iri ınfraqurylymdyq jobalardy iske asyrý úshin 2025-2029 jyldary Qordyń menshikti qarajatynyń 3,6 trln teńgesin qosqanda, shamamen 9,6 trln teńge ınvestıtsııalaý josparlanǵany baıandaldy.

Otyrys qorytyndysy boıynsha birqatar qujat qabyldandy, onyń ishinde aldaǵy kezeńge arnalǵan jumys jospary bekitildi. Qor basshylyǵy men qyzmetkerleriniń paıdaly áser koefıtsenti taýarlar men qyzmetterdi satyp alýdaǵy qazaqstandyq qamtý úlesin arttyrý boıynsha jumys tıimdiliginiń kórsetkishin qamtıdy.