Oljas Bektenov «Samuryq-Qazyna» AQ dırektorlar keńesiniń otyrysyn ótkizdi
ASTANA. KAZINFORM – Premer-mınıstr Oljas Bektenov «Samuryq-Qazyna» AQ dırektorlar keńesiniń otyrysyn ótkizdi, onda Memleket basshysynyń tapsyrmalaryn oryndaý sheńberinde ekonomıkany qoldaý jáne iri ınfraqurylymdyq jobalardy júzege asyrý boıynsha júrgizilip jatqan jumystardyń barysy qaraldy. Bul týraly Úkimettiń baspasóz qyzmeti habarlady.
«Samuryq-Qazyna» AQ-nyń 2026 jylǵy 1 toqsandaǵy óndiristik jáne qarjylyq kórsetkishterine nazar aýdaryldy. Qordyń basqarma tóraǵasy Nurlan Jaqypov esepti kezeńdegi kiristiń 8%-ǵa, taza paıdanyń 93%-ǵa ulǵaıǵany týraly habarlady. Negizgi óndiristik kórsetkishter boıynsha jospar oryndaldy.
Bıyl sáýir aıynda «Samuryq-Qazyna» kompanııasynyń 3 mlrd ıýan bolatyn debıýttik panda-oblıgatsııalaryn Qytaıdyń ishki naryǵynda sátti ornalastyrǵany mańyzdy qadam boldy. Ornalastyrý merzimi — 3 jyl, oblıgatsııalardyń kiristiligi — jyldyq 2,18%, bul — qaryz alýdyń rekordtyq tómen quny ári naryqtyń qazaqstandyq qorǵa degen senimin kórsetedi. Bul qarajatty kólik-logıstıka, ınfraqurylym jáne taǵy da basqa salalardy damytýdy qosa alǵanda, ınvestıtsııalyq jobalardy júzege asyrýǵa baǵyttaý josparlanýda.
Sonymen qatar eseptik kezeńde birqatar mańyzdy qujatqa qol qoıyldy. Olardyń qatarynda «Taý-Ken Samuryq» AQ men Ngali Holdings (Rýanda) arasyndaǵy negizgi sharttar jónindegi kelisim (Term Sheet), sondaı-aq «Samuryq-Qazyna Invest» JShS men AZCON (Ázerbaıjan) arasyndaǵy Qazaqstan men Ázerbaıjan porttarynda sý túbin tereńdetý jumystaryn júrgizý jobasy boıynsha aktsıonerlik kelisim jáne basqa da qujattar bar.
Prezıdent tapsyrmalary aıasynda jalpy quny 38,6 trln teńge bolatyn munaı-gaz, munaı hımııasy, energetıka, kólik-logıstıka jáne taý-ken salalaryndaǵy 64 iri ınvestıtsııalyq jobany júzege asyrýǵa erekshe nazar aýdaryldy. 41 joba boıynsha ERS jáne SMR kelisimsharttary jasalǵan, olardyń 33-inde qurylys-montaj jumystary bastaldy. Atap aıtqanda, osy jyldyń naýryz aıynda Jambyl jáne Pavlodar oblystarynda árqaısysynyń qýaty 1 GVt bolatyn eki iri jel elektr stansasynyń qurylysy bastaý aldy. Jobalar «jasyl» energetıkany damytýǵa jáne BUU-nyń Turaqty damý maqsattaryna (TDM) qol jetkizýge baǵyttalǵan. «Býtadıen» munaı hımııasy jobasy boıynsha Sinopec Guangzhou Engineering (QHR) kompanııasymen EPC-kelisimshart jasalǵan, jumystardy osy jyldyń mamyr aıynda bastaý josparlanýda. Taǵy 6 ınvestıtsııalyq joba jobalaý kezeńinde, al 17 joba ınvestıtsııa salý aldyndaǵy satyda tur.
«Beıneý — Bozoı — Shymkent» magıstraliniń ekinshi jelisiniń qurylysy, sondaı-aq Atyraý oblysyndaǵy «UIMT» arnaıy ekonomıkalyq aımaǵynyń máseleleri qaraldy. Joba kómirsýtek shıkizatyn tereń óńdeý salasyndaǵy iri óndiristerdi ınfraqurylymmen qamtamasyz etýdi kózdeıdi. Qazaqstan ónerkásibi men ekonomıkasy úshin geologııalyq barlaý salasynda jasandy ıntellekt tehnologııalaryn qoldanatyn «Taý-Ken Samuryq» jobasynyń mańyzy zor.
Jıyn qorytyndysy boıynsha Premer-mınıstr Oljas Bektenov qor basshylyǵyna barlyq joba boıynsha baqylaýdy kúsheıtýdi jáne olardy júzege asyrý barysynda taýarlar, jumystar men qyzmetterdegi jergilikti qamtý úlesin arttyrý úshin barlyq qajetti sharany qabyldaýdy tapsyrdy.
Aıta ketelik Úkimet aýyl sharýashylyǵy tehnıkasy óndirisin keńeıtý boıynsha sheteldik ınvestorlarmen kezdesken edi.
