Oljas Bektenov «Rosatom» ókilimen kezdesti

ASTANA. KAZINFORM - QR Úkimetiniń basshysy Oljas Bektenov «Rosatom» atom energııasy jónindegi memlekettik korporatsııasynyń bas dırektory Alekseı Lıhachevpen kezdesý ótkizdi. Bul týraly Úkimettiń baspasóz qyzmeti habarlady.

Atom energetıkasy, kvanttyq tehnologııalar, tsıfrlandyrý, sondaı-aq quzyretter men tehnologııalar almasý, kadrlyq áleýetti damytý salalaryndaǵy yntymaqtastyq máseleleri talqylandy.

Kezdesýge qatysýshylar atalǵan salalardaǵy zamanaýı tehnologııalarǵa qatysty ózekti máselelerdi qarastyrdy. Sondaı-aq salalardy odan ári damytýǵa baǵyttalǵan túrli elder sarapshylary arasyndaǵy ózara is-qımyly máseleleri atap ótildi.

Eske salsaq, jýyrda Bakýda BUU-nyń COP29 klımattyń ózgerýi jónindegi konferentsııasy aıasynda Qazaqstan ókilderi atom energııasyn paıdalanýdy úsh ese arttyrý boıynsha kúsh-jigerdi ilgeriletý jónindegi halyqaralyq is-sharaǵa qatysty. Sharadan belgili bolǵandaı Parıj kelisiminiń maqsattaryn oryndaý úshin álemdik ekonomıkany dekarbonızatsııalaýdy jedeldetýge jáne parnıktik gazdar shyǵaryndylaryn azaıtýǵa baǵyttalǵan 2050 jylǵa qaraı atom energetıkasyn úsh ese ulǵaıtý jónindegi deklaratsııaǵa Qazaqstannyń qosylatynyn jarııalady.