Oljas Bektenov Reseı kompanııalaryn ınvestıtsııalyq jobalarǵa belsendi atsalysýǵa shaqyrdy

ASTANA. KAZINFORM – Úkimet basshysy Oljas Bektenov Reseı Federatsııasynyń Premer-mınıstri Mıhaıl Mıshýstınmen kezdesýinde Reseı kompanııalaryn ınvestıtsııalyq jobalarǵa belsendi atsalysýǵa shaqyrdy.

- Eki el arasyndaǵy ózara ınvestıtsııalar kólemi ornyqty túrde artyp keledi. Sońǵy 20 jylda reseılik ınvestorlar 25,2 mlrd dollar kóleminde tikeleı ınvestıtsııa saldy. Al qazaqstandyq kompanııalar osy kezeńde Reseı ekonomıkasyna 8,7 mlrd dollar ınvestıtsııa baǵyttady. Ótken jyldyń 9 aıynda ǵana reseılik ınvestıtsııalardyń jalpy aǵyny 43,7% ósip, 2 2,8 mlrd dollar boldy, - dedi Úkimet basshysy.

Onyń aıtýynsha, Qazaqstanda 23 myńnan astam Reseıdiń úlesi bar kompanııa jumys isteıdi.

- Bul sheteldik kapıtaly bar kásiporyndardyń 40%-yna jýyq. Jalpy, biz jańa óndirister qurýǵa múddelimiz. Reseılik kompanııalarǵa Qazaqstanda birlesken ınvestıtsııalyq jobalardy iske asyrýǵa belsendi qatysýdy usynamyz.

Biz ekonomıkalyq yntymaqtastyqtyń 2021-2025 jyldarǵa arnalǵan keshendi baǵdarlamasyn iske asyrýda oń nátıjeler kórip otyrmyz. Osy turǵyda bizdiń jaýapty memlekettik organdarymyz kelesi jyldarǵa arnalǵan jańartylǵan baǵdarlamany ázirleýge kirisýi oryndy bolyp kórinedi, - dedi Oljas Bektenov.

Osyǵan deıin Qazaqstan men Reseı arasyndaǵy saýda aınalymy 11 aıda 24 mlrd dollardan asqany týraly jazdyq.