Oljas Bektenov: Prezıdenttiń bastamalary Qazaqstannyń kelesi tehnologııalyq serpilisine baǵyttalǵan
ASTANA. KAZINFORM – Digital Bridge: Oljas Bektenov úzdik otandyq IT-jobalar men tsıfrlyq bastamalarǵa marapattaryn tabys etti. Bul týraly Úkimettiń baspasóz qyzmeti habarlady.
Premer-mınıstr Oljas Bektenov Digital Bridge: Generative Nation halyqaralyq forýmynyń plenarlyq otyrysyna qatysyp, Digital Bridge Awards syılyǵynyń laýreattaryna marapattar tabys etti jáne tsıfrlyq sheshimder kórmesiniń ekspozıtsııasymen tanysty.
Oljas Bektenov jasandy ıntellektini tsıfrlandyrý jáne engizý Qazaqstan Prezıdenti aıqyndap bergen el damýynyń basym baǵyty ekenin atap ótti.
— Memleket basshysy Qasym-Jomart Toqaev jasandy ıntellektini damytýǵa basa nazar aýdaryp, Qazaqstandy aldaǵy úsh jyl ishinde naǵyz tsıfrlyq elge aınaldyrý týraly mindet qoıdy. Bizdiń azamattarymyzdyń áleýeti sheksiz jáne serpindi jobalardy jasap shyǵarýǵa múmkindikteri jetkilikti. Óz kezeginde biz olarǵa jan-jaqty qoldaý kórsetýimiz kerek. Kózdegen maqsatqa jetýde bıznes, ǵylymı orta jáne memlekettik qurylymdar bolsyn, árbir tarap mańyzdy ról atqarady, — dep atap ótti Premer-mınıstr.
Búginde Qazaqstan «elektrondyq úkimetti» damytý boıynsha álemde 24-shi, onlaın qyzmetter boıynsha 10-shy orynda tur.
Úkimet jasandy ıntellekt jáne IT-mamandaryna qolaıly jaǵdaıdyń barlyǵyn jasaý úshin qarqyndy jumys júrgizýde ekenin atap ótti. Qazirgi tańda ekojúıeniń ınfraqurylymy úzdiksiz keńeıýde. Bilim berý resýrstary barlyq azamattarǵa qoljetimdi. Búginde 20 joǵary oqý ornynda jasandy ıntellekt baǵdarlamalary iske qosylǵan. Shamamen 500 myń adam jasandy ıntellekt negizderin, onyń ishinde AI Qyzmet, AI Sana, Tomorrow school, QazCoders sııaqty baǵdarlamalar boıynsha bilim alýda.
Sonyń ishinde Alem.ai-dyń ashylýy ınfraquryLymdy nyǵaıtýda mańyzdy qadam boldy. Ol — ortalyq ǵylymı-zertteý jumystaryn júrgizý, ozyq sheshimderdi engizý jáne startaptardy damytý úshin qurylǵan biryńǵaı tsıfrlyq klasterdiń negizgi platformasy. Astana Hub ta — kreatıvti ındýstrııalardy damytýdaǵy mańyzdy quraldardyń biri. Venchýrlyq ınvestıtsııalar qory túrindegi akseleratordyń arqasynda startaptar aýqymdy qarjylandyrýǵa qol jetkizip, jahandyq naryqqa shyǵa alady.
Osy jyldyń sońyna deıin IT-qyzmetter eksportynyń kólemin $1 mıllıard dollarǵa jetkizýdi maqsat etken strategııalyq jospar júzege asýda. Qazaqstan naryǵyna qazirdiń ózinde Playrix, Mytona, NetCracker sııaqty álemdik tehnologııalyq alpaýyt kompanııalar kirip otyr. Bul bıznes pen ınvestorlardyń tarapynan turaqty serikstes retinde Qazaqstanǵa degen senimniń nyǵaıyp jatqanyn kórsetedi.
— Jýyrda qurylǵan Jasandy ıntellekt jáne tsıfrlyq damý mınıstrliginiń basty mindeti — kelesi tehnologııalyq serpiliske qol jetkizýdi qamtamasyz etý. Osy maqsatta quqyqtyq bazany jetildirip, jasandy ıntellekt jáne IT-mamandaryn qoldaý sharalaryn keńeıtiledi. Ulttyq bilim berý platformasyn ázirleý jáne Jasandy ıntellekt salasyndaǵy zertteý ýnıversıtetin qurý jónindegi Prezıdent bastamalary bolashaq naryqqa bilikti kadrlardy daıarlaýǵa aıtarlyqtaı serpin beredi, — dep atap ótti Oljas Bektenov.
Premer-mınıstr Qazaqstan Úkimeti qýatty ekonomıka qurý maqsatynda elimiz úshin mańyzdy jobalardy júzege asyrý boıynsha birlesken jumysqa tolyqtaı ashyq ekenin atap ótti. Forýmnyń nátıjesinde 30-dan astam mańyzdy memorandýmǵa qol qoıylyp, ózara yqpaldastyqtyń jańa baǵyttaryna qol jetkizildi. Úkimet janynan qurylǵan Tsıfrlyq shtab memlekettik organdardyń tolyq tsıfrlyq transformatsııasyn júzege asyrý, bıznestegi týyndaıtyn máselelerdi jedel sheshý jáne naryqtyń barlyq qatysýshylary úshin artyq kedergilerdi joıý baǵytynda jumys isteıdi.
Odan bólek Digital Bridge Awards baıqaýynyń jeńimpazdaryn marapattaý saltanaty ótti. Oljas Bektenov úzdik otandyq IT-jobalar men tsıfrlyq bastamalarǵa marapattar tabys etti.
Digital Bridge Awards 2025 premııasynyń nomınatsııalar boıynsha laýreattary bolyp kelesi úmitkerler tanyldy:
▫️ Export Excellence — Roman Lıneıtsev (Grand Mobile). Ol GTA rýhyn mobıldi qurylǵyǵa kóshirip ákelgen, óziniń ashyq álemi bar, kóp ret paıdalanýǵa bolatyn róldik oıyn jasap shyǵardy. Onda paıdalanýshylar ózara árekettesip, mansap qýyp, óz ekonomıkasyn qura alady. Mobıldi oıyn álem boıynsha 60 mln retten astam kóshirilgen.
▫️AI Solution of the Year — Aleksandr Mashrabov (Higgsfield AI). Mátin túrinde suraý salý boıynsha beıne jáne anımatsııa jasaýǵa arnalǵan jasandy ıntellektige negizdelgen platformanyń negizin qalaýshy. Ol Google Next nusqasy boıynsha álemniń úzdik 25 startapynyń qataryna endi.
▫️EdTech of the Year — Janádil Taldybaev (CodiPlay). Ol baǵdarlamalaý jáne ınjenerlik oılaýǵa oqytatyn mektepter úshin bilim berý ekojúıesin qurdy. Startap 13 eldegi mıllıonnan astam oqýshyny qamtıdy.
▫️GovTech Innovation — Baıjan Qanafın (Documentolog Global Limited). Ol memlekettik basqarý protsesterin avtomattandyrý úshin tsıfrlyq sheshimder ázirlep shyǵardy, onda elektrondy túrdegi normatıvter shyǵarý jáne ıntellektýaldy izdeý júıeleri de bar.
▫️Tech Media Excellence — Vıtalıı Volıanıýk (digitalbusiness.kz). Tehnologııalar men startaptar týraly iri qazaqstandyq medıanyń negizin qalaýshy. Ony aı saıyn 200 myńnan astam biregeı paıdalanýshy oqıdy.
▫️ Social Impact Project — Dáýren Tólebaev (7Generation / KazDream IT Holding). Ol azamattardyń qaýipsizdigin qamtamasyz etýde jedel áreket etetin shuǵyl qyzmetterge qońyraý shalý kezinde abonentterdiń ornalasqan jerin anyqtaýǵa arnalǵan LifeSignal servısin qurdy.
Premer-mınıstr, sonymen qatar, tsıfrlyq sheshimder kórmesiniń ekspozıtsııasymen tanysty, onda otandyq IT-kompanııalar men startap ıeleri óz ázirlemelerin usyndy.
Olar – IT-kompanııalar: Shai PRO – ıntellektýaldy ónimder men JI negizindegi sheshimderdiń ekojúıesi; Best Vision Technologies – ónerkásiptik táýekelderdi anyqtaýǵa jáne óndiristik protsesterdi qashyqtan basqarýǵa arnalǵan JI platformasy; Axellero – kúndelikti mindetterdi avtomattandyratyn jáne bıznestiń tıimdiligin arttyratyn JI agentterin qurýǵa arnalǵan platforma; Qalan – mektepter men EdTech jobalaryna arnalǵan onlaın bilim berý platformasy; Recado – munaı-gaz salasyna arnalǵan JI negizindegi sheshimder jáne Jet – kólik pen tehnıkany qysqa merzimdi jalǵa alýǵa arnalǵan sherıng-sýperapp.
Startap-kompanııalar: Paidax – bólshek ınvestorlarǵa arnalǵan ınvestıtsııalyq platforma; PocketDot – kórý qabileti buzylǵan adamdar úshin Braıldiń alǵashqy magnıttik ınterfeısi; Defect AI – óndiristik aqaýlardy avtomatty túrde anyqtaýǵa arnalǵan JI júıesi; Protector AI – mektepterde, balabaqshalarda jáne áleýmettik mekemelerde zorlyq-zombylyqty, qorqytýdy jáne qaqtyǵystardy avtomatty túrde anyqtaýǵa arnalǵan beıne taldaý júıesi; Esep AI – energııa tutynýdy taldaý júıesi; Trust Exam – onlaın emtıhandardy avtomattandyrý jáne monıtorıng jasaý JI-platformasy; Biometric Vision – bıometrııalyq sáıkestendirý jáne KYC-servıs (aǵylshynsha Know Your Customer – «Óz klıentińdi bil») tehnologııalary; Mirai Tech – sensorlyq tehnologııalarǵa, bıomehanıkaǵa jáne derekterge negizdelgen ıntellektýaldy monıtorıng jáne taldaý júıeleri.
Іs-shara álemniń 30-dan astam elinen kelgen ınvestorlardyń, sarapshylardyń, startaptar men IT-kompanııalardyń ókilderinen turatyn 30 myńnan astam qatysýshynyń basyn biriktirdi.