Oljas Bektenov Prezıdent tapsyrmalaryn oryndaý boıynsha Úkimet múshelerine tapsyrmalar berdi
ASTANA. KAZINFORM - Premer-mınıstr Oljas Bektenov Memleket basshysynyń bıylǵy 28 qańtarda ótken Úkimettiń keńeıtilgen otyrysynda bergen tapsyrmalaryn iske asyrý máseleleri boıynsha keńes ótkizdi.
Bul týraly Úkimettiń baspasóz qyzmeti habarlady.
Premer-mınıstrdiń orynbasarlary, mınıstrler men birqatar uıym basshylyǵy ekonomıka salalarynyń ósýin qamtamasyz etý, ınvestorlar úshin zańnamalyq jaǵdaılardy jetildirý, sırek jer metaldary óndirisin damytý, ıadrolyq klaster qurý, jer qoınaýyn paıdalaný salasyn reformalaý, jol jáne kólik-logıstıkalyq, ınjenerlik ınfraqurylymdy jańǵyrtý, «Zań jáne Tártip» qaǵıdatyn qamtamasyz etý, tsıfrlyq sheshimder men jasandy ıntellekt engizý, bilim berý jáne medıtsınalyq qyzmetter sapasyn odan ári arttyrý jónindegi josparlar týraly baıandady.
Premer-mınıstr aldaǵy kezeńdegi jumystyń basty baǵyty azamattardyń turmys sapasyn jaqsartýǵa baǵyttalǵan ekonomıkanyń ósýin qamtamasyz etý ekenin atap ótti. Úkimet barlyq baǵyt boıynsha jedel sheshimder qabyldap, Prezıdent tapsyrmalarynyń ýaqtyly iske asyrylýyn qamtamasyz etedi.
«Biz ınvestıtsııalardy tartý, salyq-bıýdjet saıasatyn jáne jer qoınaýyn paıdalaný salasyn reformalaý, elimizdiń básekelestik artyqshylyqtaryn kúsheıtý, iskerlik ahýaldy jaqsartý, ınfraqurylymdyq jáne energetıkalyq damý, tsıfrlandyrýdyń tutas júıesin jáne halyqty áleýmettik qamsyzdandyrý júıesin qaıta qaraý baǵytynda belsendi jumys isteýimiz kerek. Ol úshin Úkimette ókilettikter jetkilikti. Mınıstrler men ákimder jedel sheshimder qabyldaýǵa jáne qoıylǵan mindetterdi iske asyrýǵa tolyq jaýapty bolýǵa tıis. Memleket basshysy keshe aıtqan árbir baǵyt boıynsha naqty nátıje, ortalyqta da, jergilikti jerlerde de árbir basshynyń tıimdi jumysy qajet. Investorlardyń naqty máselelerin sheshýmen aınalysyp, áýre-sarsańǵa salmaı, kerisinshe – kásipkerlerdiń kelýine, damýyna, zaýyttar, kásiporyndar, óndirister salýyna kómektesý kerek. Árbir basshy muny óz jumysynyń basty qaǵıdaty dep bilýi tıis. Tek naqty jumys qajet. Eski, bıýrokratııalyq jumys ádisterin, formalızmdi qoldana otyryp, jańa jaǵdaılarda oń nátıjege qol jetkizý múmkin emes. Memlekettik organdarǵa Memleket basshysy júktegen mindetterdi sapaly oryndaýǵa kóńil bólýdi, basy artyq qazaǵazbastylyqsyz jáne kópke sozbaı batyl sharalar qabyldaýdy tapsyramyn. Bizdiń bárimizden naqty nátıje kútip otyr», — dep atap ótti Oljas Bektenov.
Premer-mınıstr bıýdjettik tártipti qatań nyǵaıtýǵa jáne memlekettik bıýdjetti basym baǵyttar boıynsha teńgerimdi bólýge basa nazar aýdara otyryp, jumystyń birinshi kezektegi birqatar baǵytyna nazar aýdardy.
Aıta keteıik, keshe Prezıdenttiń tóraǵalyǵymen Úkimettiń keńeıtilgen otyrysy ótip, onda elimizdiń 2024 jylǵy áleýmettik-ekonomıkalyq damýynyń qorytyndylary shyǵarylyp, Úkimettiń aldaǵy kezeńge arnalǵan negizgi mindetteri belgilengen bolatyn.