Oljas Bektenov Prezıdent atynan jumysshy mamandyqtary ókilderine marapat tabystady
ASTANA. KAZINFORM - Premer-mınıstr Eńbek kúnine arnalǵan «Eńbek adamy – El maqtanyshy» respýblıkalyq forýmyna qatysty. Oljas Bektenov Memleket basshysynyń atynan el ekonomıkasynyń nyǵaıýyna jáne damýyna úles qosqan jumysshy mamandyqtary ókilderine memlekettik nagradalardy tabystady. Bul týraly Úkimettiń baspasóz qyzmeti habarlady.
Forýmǵa qatysýshylarǵa arnap sóılegen sózinde Premer-mınıstr Prezıdenttiń Ulttyq quryltaıda belgilep bergen «Adal adam – Adal eńbek – Adal tabys» qaǵıdaty búginde Qazaqstan qoǵamynyń damýyndaǵy basty baǵytyna aınalǵanyn atap ótti.
Qazaqstanda Eńbek kúni on jyldan astam ýaqyttan beri atalyp keledi. Bıylǵy Jumysshy mamandyqtary jyly aıasynda bul merekeniń mańyzy artyp, qoǵam damýynyń negizi sanalatyn adal eńbekke qurmettiń belgisine aınaldy. Qazir elde shamamen 2,5 mln maman eńbek etedi. Olardyń qatarynda shahterler, metallýrgter, pedagogtar, energetıkter, medıtsına qyzmetkerleri, qurylysshylar, agronomdar, tehnologtar jáne basqa da sala ókilderi bar.
Úkimet jumysshy mamandyqtary ıelerine árdaıym jan-jaqty qoldaý kórsetip keledi. Eńbek jaǵdaılary jaqsartyla otyryp, ondaǵy protsester avtomattandyrylýda. Tehnıkalyq bilim berý júıesi reformalanyp, kásibı standarttar jańartylýda. Ǵylym men óndiris arasyndaǵy baılanys nyǵaıyp keledi.
Jumysshy mamandyqtaryna arnap jaıly jaǵdaı jasaý baǵytyndaǵy mańyzdy qadamnyń biri – Prezıdent bastamasymen Otbasy bankinde arnaıy «Naýryz jumysker» baǵdarlamasynyń iske qosylǵany boldy. Búginde bul baǵdarlama arqyly 2 myńnan astam otbasy baspanaly boldy. Sonymen qatar tsıfrlyq tehnologııalardy damytý – erekshe nazarda.
— Memleket basshysy Qazaqstannyń bolashaǵyn ınnovatsııalyq damý jolynda kóredi. Ol halyqqa Joldaýynda aýqymdy tsıfrlandyrýdy jáne jasandy ıntellektini belsendi engizýdi basymdyq retinde aıqyndady. Aldyńǵy qatarǵa jańa tehnologııalar shyǵady. Bul – ekonomıkalyq ósimge jáne azamattardyń ómir sapasyn odan ári jaqsartýǵa keń múmkindik. Innovatsııalyq sheshimder ónerkásipke, kólik salasyna, medıtsınaǵa, bilim berýge jáne basqa da kóptegen salalarǵa engizilip jatyr. Barlyq jasalyp jatqan shara qýatty Tsıfrlyq Qazaqstandy qalyptastyrýǵa baǵyttalǵan, — dep atap ótti Oljas Bektenov.
Úkimet júrgizip otyrǵan tsıfrlyq progreske qol jetkizý jumystary aıasynda kadrlardy daıarlaý jáne kásibı-tehnıkalyq bilim berýdi damytý basty nazarda bolyp otyr. Bıyl 9-synyp túlekteriniń 100%-y geologııa, mashına jasaý, energetıka, kólik, IT jáne basqa da suranysqa ıe mamandyqtar boıynsha kolledjderde tegin bilim alýmen qamtyldy. Sońǵy eki jylda stýdentterdiń shákirtaqysy eki ese ósti. Kolledjderde materıaldyq-tehnıkalyq baza jańartyldy, stýdentterdiń jataqhanamen qamtylýy shamamen 90%-ǵa jetti.
Úkimet azamattarǵa jańa daǵdylardy ıgerýge jáne básekege qabilettilikti arttyrýǵa barlyq jaǵdaıdy jasaýǵa múddeli. Eldiń barlyq óńirinde bilim berý mekemeleri men óndiris oryndary arasyndaǵy yntymaqtastyq nyǵaıyp keledi. Kolledjderdi qamqorlyqqa alǵan kásiporyndardyń sany 8 ese artty, bıznespen jasalatyn dýaldy kelisimsharttar sany 2 ese kóbeıdi.
Іs-shara barysynda Halyqaralyq eńbek uıymynyń bas dırektory Jılber Fossýn Hýngbo forým qatysýshylaryna beıneúndeý joldady. Ol áleýmettik dıalogty qamtamasyz etýde jáne eńbek naryǵynyń ınklıýzıvti ári turaqty damýyna járdemdesýde sheshýshi ról atqaratyn jumys berýshiler men qyzmetkerlerdiń ókildi uıymdarynyń mańyzdylyǵyn atap ótti.
Onyń aıtýynsha, búgingi tańda áleýmettik seriktester osy dıalogty damytyp, ári qaraıǵy qadamdardy anyqtap, birlesip jumys isteýdi jalǵastyrýda. Sondaı-aq «PARYZ» Ulttyq jumys berýshiler konfederatsııasy prezıdıýmynyń tóraǵasy Jumabek Janyqulov sóz sóıledi.
Forým aıasynda uıymdastyrylǵan kórmede Premer-mınıstr qazaqstandyq ónerkásip kásiporyndarynyń óndiris protsesine ozyq tehnologııalardy engizý boıynsha júrgizip jatqan jumystarymen tanysty. «QARMET», «Qazaqmys», «Qaztsınk» jáne ERG kompanııalary joǵary tehnologııalyq salalarǵa arnalǵan metallýrgııalyq ónim shyǵarý, óndiristerde monıtorıng júıesin engizý, baıytý fabrıkalarynyń tsıfrlyq úlgilerin jasaý jáne taǵy da basqa jobalaryn tanystyrdy.
Bıznestiń bastamalary óndiris úderisterin «aqyldy» basqarýǵa jáne barynsha tıimdilikke qol jetkizýge, sondaı-aq kolledjderdi qoldaý arqyly kásibı kadrlardy daıarlaýǵa, onda zamanaýı oqý kabınetteri men sheberhanalardy ashýǵa baǵyttalǵan.
Forým qorytyndysy boıynsha jumysshy mamandyqtary ókilderine memlekettik nagradalar tabystaldy.
Memleket basshysy 2025 jyldy Jumysshy mamandyqtary jyly dep jarııalady. Onyń negizgi maqsaty – eńbek adamyn baǵalaý. Bul týraly ІІІ dárejeli «Eńbek Dańqy» ordeniniń ıegeri Aqmaral Aýǵanova aıtty.
– Eńbegimizdi baǵalap, marapattap jatqan Prezıdentimizge alǵysymdy bildiremin. Men 43 jyl jumys istep, qurmetti eńbek demalysyna shyqtym. 2025 jyldy Jumysshy mamandyqtary jyly dep jarııalady ǵoı. Osynyń negizinde qosymsha mamandyqtar paıda bolady dep oılaımyn. Meniń oıymsha bul jastar úshin úlken múmkindik. Elimiz damyp, órkendep, jastarymyz bıik belesterdi baǵyndyra bersin, - dedi ol.
Aıta keteıik, Astanada Eńbek kúnine oraılastyrylǵan «Jumysshy mamandyqtar jylynda oqýdan eńbekke tıimdi kóshý úshin seriktester dıalogy — 2025» atty halyqaralyq konferentsııa bastaldy.
Úsh kún boıy qazaqstandyq jáne halyqaralyq sarapshylar jastardyń eńbek naryǵyna shyǵýyna kómektesetin ozyq tájirıbelerdi, saıası tásilderdi jáne ınnovatsııalyq sheshimderdi talqylaıdy. Ásirese eýropalyq ESCO modeline negizdelgen Tsıfrlyq quzyretter bankin engizýge de basa kóńil bólinip otyr ıaǵnı Eýropada maman qalaı daıarlansa, Qazaqstanda da sol standarttar saqtalady.