Oljas Bektenov Premer-Mınıstr bolyp taǵaıyndaldy

ASTANA. KAZINFORM – Májilis depýtattary Premer-Mınıstr laýazymyna Oljas Abaıuly Bektenovti taǵaıyndaýǵa kelisim berdi.

Májilis depýtattary Úkimet basshysy kandıdatýrasyn talqylaǵannan keıin «Qazaqstan Respýblıkasynyń Prezıdentine Qazaqstan Respýblıkasy Premer-Mınıstri laýazymyna Bektenov Oljas Abaıulyn taǵaıyndaýǵa kelisim berilsin» degen qaýly jobasyna daýys berdi.

Daýys berý barysynda jalpy otyrysqa qatysqan depýtattardyń 69-si onyń kandıdatýrasyn qoldap, 7 depýtat qalys qaldy.

Іle-shala Memleket basshysynyń Oljas Abaıuly Bektenovty Qazaqstan Respýblıkasynyń Premer-Mınıstri etip taǵaıyndaý jónindegi jarlyǵy shyqty.

Ol burynǵy atqarǵan laýazymynan bosatyldy. 

Buǵan deıin Memleket basshysyna AMANAT partııasynyń atynan Premer-Mınıstr laýazymyna Oljas Abaıuly Bektenovtiń kandıdatýrasy usynylǵan edi.

Májilistiń plenarlyq otyrysynda Memleket basshysy Qasym-Jomart Toqaev Premer-Mınıstr laýazymyna Oljas Bektenovty taǵaıyndaý úshin depýtattardyń kelisim berýin surady.

Oljas Abaıuly 1980 jyly 13 jeltoqsanda Almaty qalasynda týǵan.

Qazaq memlekettik zań akademııasyn (2001 j.) úzdik bitirgen, mamandyǵy «Zańger».

ІІ dárejeli «Aıbyn» (2014 j.) jáne «Dańq» (2021 j.) ordenderimen nagradtalǵan.

2002-2005 jyldary Almaty qalasy Ádilet basqarmasy bóliminiń bas mamany.

2005-2006 jyldary QR Premer-Mınıstri Keńsesiniń zań bóliminiń sarapshysy, bas sarapshysy.

2006-2009 jyldary QR Prezıdenti Ákimshiliginde jumys jasady.

2009-2012 jyldary QR Ádilet mınıstrliginiń Tirkeý qyzmeti jáne quqyqtyq kómek kórsetý komıteti tóraǵasynyń orynbasary.

2012-2014 jyldary QR Ekonomıkalyq qylmysqa jəne sybaılas jemqorlyqqa qarsy agenttiginiń (qarjy polıtsııasy) ortalyq apparatynda departament bastyǵy.

2015-2016 jyldary Astana qalasy ákiminiń apparat basshysy, QR Prezıdenti Ákimshiligi Basshysy Hatshylyǵynyń meńgerýshisi.

2016-2017 jyldary Sybaılas jemqorlyqqa qarsy is-qımyl Ulttyq bıýrosynyń (Sybaılas jemqorlyqqa qarsy qyzmet) Astana qalasy boıynsha departamentiniń basshysy.

2017-2018 jyldary Aqmola oblysy ákiminiń orynbasary.

2018-2019 jyldary Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttigi Tóraǵasynyń orynbasary.

2019-2022 jyldary Qazaqstan Respýblıkasynyń Sybaılas jemqorlyqqa qarsy is-qımyl Agenttigi Tóraǵasynyń birinshi orynbasary.

2022 jyldyń aqpanynan bastap Qazaqstan Respýblıkasynyń Sybaılas jemqorlyqqa qarsy is-qımyl agenttiginiń tóraǵasy qyzmetin atqardy.