Oljas Bektenov pen sarapshylar ulttyq ekonomıkanyń damý baǵyttaryn qarastyrdy
ASTANA. KAZINFORM – Premer-mınıstr Oljas Bektenov ekonomıkalyq blok sarapshylarymen kezdesý ótkizdi. Onda ekonomıkalyq damý jáne ekonomıkanyń basym salalary, sondaı-aq syrtqy táýekel máseleleri sóz boldy.
Jıyndy asha otyryp, Úkimet basshysy ornyqty ekonomıkalyq ósýdi qamtamasyz etý jáne halyqtyń naqty ál-aýqatyn arttyrý basym mindet bolyp qala beretinin atap ótti.
Oljas Bektenov saraptama men keńester alý úshin jumys tásilderin jan-jaqty talqylaý boıynsha kezdesýlerdiń mańyzdylyǵyna toqtaldy.
Kezdesý barysynda sarapshylar qaýymdastyǵynyń ókilderi ekonomıkalyq ósýdiń negizgi máseleleri men baǵyttaryna óz baǵasyn berdi. Sarapshylar sondaı-aq jahandyq protsester men álemdik konıýnktýranyń yqpalyn eskere otyryp, ulttyq ekonomıkanyń damý qarqyny boıynsha boljamyn aıtty. Salalyq jańǵyrtýdyń basymdyqtary, naryqtyń neǵurlym ózekti suranystary jáne olarmen tehnologııalyq bastamalardy ózara baılanystyrý boıynsha usynystar aıtyldy.
Eýrazııa ulttyq ýnıversıtetiniń Dırektorlar keńesiniń tóraǵasy Jaqsybek Kúlekeev, NAC Analytica basqarma tóraǵasy Rasýl Rysmambetov, AERC Qoldanbaly ekonomıka zertteý ortalyǵynyń bas dırektory Jánibek Aıǵazın, Visor ınvestıtsııalyq kompanııasynyń basqarýshy seriktesi Almas Chýkın, Zertteý jáne konsaltıng ortalyǵynyń seriktesi Ánýar Boranbaev, CSI jeke konsaltıngtik kompanııasynyń aǵa seriktesi Oljas Qudaıbergenov, "TALAP qoldanbaly zertteýler ortalyǵy" qoǵamdyq qorynyń dırektory Asqar Qysyqov, "Kommentarıı" taldaý tobynyń jetekshisi Eldar Shamsýtdınov pikirleri men usynystaryn aıtyp, sóz sóıledi.
Inflıatsııaǵa qarsy kúres sharalary, otandyq óndiristi ulǵaıtý, salyqtyq ákimshilendirýdi jetildirý, JI-di damytý úshin elektr energııasyn óndirý, ınvestıtsııalar tartý máseleleri talqylandy.
Salyq reformasyn talqylaý kezinde ótpeli kezeńniń mańyzdylyǵy atap ótildi. Úkimettiń sheshimine sáıkes QQS boıynsha esepke qoıý sheginen asqan salyq tóleýshiler ákimshilik jaýapkershilikke tartylmaıdy. Salyqtar boıynsha ósimpuldar men aıyppuldar qaryzdyń negizgi somasy 2026 jyldyń 1 sáýirine deıin ótelgen jaǵdaıda esepten shyǵarylady.
Kezdesýdi qorytyndylaı kele Premer-mınıstr Úkimet pen sarapshylar qaýymdastyǵy arasyndaǵy turaqty dıalogtyń mańyzdylyǵyn atap ótip, jaýapty memlekettik organdarǵa aıtylǵan usynystardy pysyqtaýdy tapsyrdy.
Eske sala keteıik, Úkimette jańa kodekster men keshendi jospar bekitilgenin jazǵan edik.