Oljas Bektenov pen Nıkol Pashınıan kezdesýinde qandaı máselege nazar aýdaryldy
ASTANA. KAZINFORM – Úkimet úıiniń ǵımaratynda Qazaqstan Premer-mınıstri Oljas Bektenov pen elimizde resmı saparmen júrgen Armenııa Respýblıkasynyń Premer-mınıstri Nıkol Pashınıannyń kezdesýi ótti. Bul týraly Úkimettiń baspasóz qyzmeti habarlady.
Onda saýda-ekonomıkalyq yntymaqtastyq máselesi qarastyrylyp, Qazaqstan Prezıdenti Qasym-Jomart Toqaevpen kelissózder qorytyndysy boıynsha qol jetkizilgen qazaq-armıan ýaǵdalastyqtaryn júzege asyrý máseleleri talqylandy.
Saýda, aýyl sharýashylyǵy, ónerkásip kooperatsııasy, kólik, tsıfrlandyrý, ǵarysh ındýstrııasy, týrızm jáne mádenı-gýmanıtarlyq jobalarǵa nazar aýdaryldy.
Kezdesý barysynda saýda-ekonomıkalyq baılanystardy nyǵaıtýdyń jáne ekijaqty taýar aınalymynyń qarqyndy ósýin qamtamasyz etýdiń mańyzdylyǵy atap ótildi. Sońǵy bes jylda ózara saýda kólemi 2020 jylǵy $14,2 mln-nan 2024 jylǵy $82,8 mln-ǵa deıin alty esege ósti. 2025 jylǵy qańtar-qyrkúıek aılarynda taýar aınalymy $41,6 mln boldy. Osy baǵyttaǵy odan arǵy ózara is-qımyl sheńberinde 2026-2030 jyldarǵa arnalǵan taýar aınalymyn ulǵaıtý jónindegi jol kartasyn is júzinde asyrý, erkin jáne arnaıy ekonomıkalyq aımaqtarda birlesken óndiris oshaqtaryn qurý, sondaı-aq «Qazaqstannyń eksporttyq-kredıttik agenttiginiń» saqtandyrý quraldaryn paıdalana otyryp, iskerlik baılanystarǵa járdemdesý jaıy talqylandy. Osylardyń nátıjesinde qazaqstandyq metallýrgııa, munaı-hımııa jáne tamaq ónimderiniń qosymsha eksporty shamamen $350 mln quraýy múmkin.
Aýyl sharýashylyǵy salasy AÓK ónimderin ózara jetkizýde úlken áleýetke ıe.
Taraptar Qazaqstannyń joǵary sapaly astyǵyn Armenııaǵa eksporttaý perspektıvalaryna da toqtaldy. Sondaı-aq, maýsymaralyq kezeńde ishki naryqty qolaıly baǵamen qamtamasyz etý úshin Armenııadan jańa pisken jemister men erte kókónisterdi jáne jańǵaqtardy ımporttaý jaıy da qyzyǵýshylyq týdyrdy. 2024 jyly AÓK ónimderiniń taýar aınalymy 7,7%-ǵa ósip, $9,7 mln bolǵan. Osy jyldyń basynan beri bul kórsetkish ótken jyldyń sáıkes kezeńimen salystyrǵanda 35,2%-ǵa ulǵaıyp, $9,2 mln-ǵa jetti.
Taraptar ónerkásiptik kooperatsııany odan ári damytýdy, mashına jasaý, metallýrgııa, jeńil ónerkásip jáne elektrotehnıkalyq ónimderdi, onyń ishinde akkýmýlıatorlar men transformatorlardy jetkizýmen qatar birlesken jobalardy júzege asyrýdy talqylady – qazirdiń ózinde 27 myńnan astam birlik eksporttaldy.
Yntymaqtastyqtyń erekshe perspektıvalary jeńil ónerkásipte jáne shıkizatty óńdeý men daıyn ónimdi óndirý úshin birlesken kásiporyndar qurýda baıqalady.
Kólik-logıstıka salasy – taraptar Ortalyq Azııa men Ońtústik Kavkaz naryqtarynyń ıntegratsııalanýynyń jańa múmkindikterin, sondaı-aq avtomobıl tasymaldarynyń dınamıkasyn arttyrý úshin Qazaqstanda logıstıkalyq ortalyqtardyń ashylýyn atap ótti.
Sonymen qatar tsıfrlandyrý jáne ǵarysh salasyndaǵy yntymaqtastyq máseleleri talqylandy. JI jáne GovTech damytý, IT-tehnologııalardy eksporttaý, tehnoparkterdi keńeıtý, bilim berý bastamalary, mysaly, Astanada TUMO Ventures fılıalynyń aldaǵy ashylýy, baqylaý astronomııasy boıynsha, onyń ishindegi negizgi basymdyqtar – Ulttyq vırtýaldy observatorııany damytý jónindegi jobalardy júzege asyrý.
Týrızm salasy da aıtarlyqtaı áleýet kórsetip otyr. Atap aıtqanda, týrıstik aǵyndardyń ulǵaıýy, taý týrızminiń damýy, elder arasynda tikeleı áýe reısteriniń ashylýy jáne ushý geografııasynyń keńeıýi. Taý týrızmin damytýǵa erekshe kóńil bólinedi. Qazaqstan týrısterdi tartý ortalyǵy jáne týrıstik salany damytýdyń mańyzdy elementi bolatyn álemdik deńgeıdegi jańa kýrort – Almaty taý klasterin júzege asyrýǵa kiristi.
Kezdesý sońynda Premer-mınıstrler Oljas Bektenov pen Nıkol Pashınıan elderdiń úkimetteri joǵary deńgeıde qol jetkizilgen ýaǵdalastyqtardy júzege asyrý úshin bar kúshin salatynyn atap ótti.
Resmı sapar aıasynda Qazaqstan Respýblıkasynyń Ulttyq mýzeıi men Alem.ai halyqaralyq jasandy ıntellekt ortalyǵyna bardy.
Aıta keteıik, Armenııa Premer-mınıstri Nıkol Pashınıan Memleket basshysy Qasym-Jomart Toqaevpen kelissózderden keıingi brıfıngte armıan tarapy yntymaqtastyqtyń barlyq baǵytyn keńeıtýge daıyn ekenin rastady.