Oljas Bektenov Pavlodar oblysyndaǵy iri kásiporyndardy aralady
ASTANA. KAZINFORM – Premer-Mınıstr Oljas Bektenov Memleket basshysy Qasym-Jomart Toqaevtyń eksportqa baǵdarlanǵan ónerkásipti damytý jáne Pavlodar oblysynyń kásiporyndaryn tehnologııalyq jańǵyrtý jónindegi tapsyrmalarynyń oryndalý barysymen tanysty.
Úkimet basshysy KSP Steel, «Qazaqstan Alıýmınııi», «Qazaqstandyq elektrolız zaýyty», Aqsý ferroqorytpa zaýyty jáne Aqsý elektr stansasynda boldy. Oljas Bektenov óńirge jumys sapary aıasynda munaı-gaz salasyna arnalǵan jiksiz bolat qubyrlar, armatýra jáne basqa da ónimder shyǵaratyn KSP Steel zaýytynyń óndiristik tsehtaryna bardy.
Búgingi tańda KSP Steel – 4,5 myńnan astam adam jumys isteıtin bolat balqytý sektoryndaǵy ekinshi mańyzdy kásiporyn. Negizgi problemalyq máselelerdiń biri – zaýyttyń tolyq óndiristik qýatqa shyǵýy.
Premer-Mınıstr qazirgi ýaqytta Úkimet otandyq óndirýshilerdi tolyq óndiristik qýatqa shyǵarý úshin tıisti jaǵdaı jasaýǵa kúsh salyp jatqanyn atap ótti. Óz kezeginde, kompanııa qajetti ınvestıtsııalardy sala otyryp, óndiristi jańǵyrtýy jáne tutynýshylarmen tikeleı offteık-kelisimsharttar jasasýy tıis.
Úkimet basshysy sondaı-aq álemdegi jetekshi alıýmınıı óndirýshileriniń biri «Qazaqstan Alıýmınııi» AQ qyzmetimen tanysty. Zaýytta 30-dan astam metallýrgter dınastııasy eńbek etip jatyr. Kásiporyn quramynda Pavlodar turǵyndarynyń 40%-yn jylýmen qamtamasyz etip otyrǵan jylý elektr stansasy jumys isteıdi.
Oljas Bektenovtiń aıtýynsha, qoldanystaǵy alıýmınıı klasteri tek óńir úshin ǵana emes, búkil respýblıka úshin úlken mańyzǵa ıe.
«Óndiristik óńdeý deńgeıin arttyrý jáne ekologııalyq talaptardy eskere otyryp, kásiporyndy tehnıkalyq jańǵyrtý boıynsha jumysty jalǵastyrý qajet», - dedi Premer-Mınıstr.
Ónerkásiptik nysandardy aralaǵan Oljas Bektenov shıkizatty odan ári óńdeý boıynsha jumysty kúsheıtýdiń mańyzyn atap ótti. Sondaı-aq ekonomıkany ındýstrııalandyrý qarqynyn qamtamasyz etý úshin otandyq kásiporyndarǵa jan-jaqty qoldaý kórsetýdi tapsyrdy.
