Oljas Bektenov otandyq mashına salasyn damytý boıynsha tapsyrma berdi
ASTANA. KAZINFORM –«Samuryq-Qazyna» qoryna 2025 jyldyń sońyna deıin satyp alý rásimindegi jergilikti qamtý úlesin 89%-ǵa deıin arttyrý tapsyryldy. Bul týraly QR Premer-Mınıstri Oljas Bektenov Úkimet otyrysynda aıtty.
«Otandyq óndirýshilerdi qoldaý úshin biz birqatar mashına jasaý taýarlaryn memlekettik satyp alý tiziminen shyǵardyq. Osyǵan qaramastan, merdiger uıymdardyń jasyryn túrde ımporttyq taýarlardy satyp alý faktileri jalǵasýda. Sondyqtan Ónerkásip jáne Qarjy mınıstrlikterine jumystar men kórsetiletin qyzmetterdegi otandyq úles talaptarynyń oryndalýyna baqylaýdy kúsheıtýdi tapsyramyn. Sonymen birge, Premer jabdyqtardyń tozý deńgeıin tómendetýdi tapsyrdy. Mashına jasaýda bul kórsetkish orta eseppen 40%-ǵa jýyqtaıdy. «Mashına jasaý kásiporyndary óndiristi jańǵyrtyp, taýarlardyń jańa túrlerin shyǵarý úshin jeńildikti nesıelermen qamtylýǵa tıis. Ónerkásip, Qarjy, Ulttyq ekonomıka mınıstrlikterine jáne «Báıterek» holdıngine maquldanǵan qarjy-ekonomıkalyq negizdemeler sheńberinde mashına jasaýdaǵy jobalardy qosymsha qarjylandyrýdy tapsyramyn», - dedi Oljas Bektenov.
Sondaı-aq «Samuryq-Qazyna» qory jáne onyń enshiles uıymdary – otandyq mashına jasaý salasy ónimderiniń iri tutynýshylarynyń biri. Bıylǵy jyl qorytyndysy boıynsha holdıngtiń satyp alý rásimindegi jergilikti qamtý úlesin 82%-ǵa deıin ulǵaıtý kútilýde.
«Samuryq-Qazyna» qoryna 2025 jyldyń sońyna deıin bul kórsetkishti 89%-ǵa deıin arttyrýdy tapsyramyn. Kásiporyndardy qoldaý úshin ári qaraı da offteık jáne uzaqmerzimdi kelisimsharttar mehanızmin paıdalaný kerek. Mundaı sharttardy bekitý kezinde bıznestiń qarsy mindettemelerin kózdeý qajet. Olar lokalızatsııalaý deńgeıin arttyryp, jańa jumys oryndaryn qurýǵa, iri kásiporyndardyń aınalasynda shaǵyn jáne orta kásiporyndar ashýǵa basa nazar aýdarýǵa tıis. Bul mashına jasaý salasymen qatar, búkil ónerkásiptiń ósýine mýltıplıkatıvtik áser beredi», - dedi Premer-Mınıstr.
