Oljas Bektenov: Órtten qaza tapqandardyń deni — zeınetkerler, jumyssyzdar, múgedektigi bar adamdar

ASTANA. KAZINFORM — Premer-mınıstr Oljas Bektenov Úkimet otyrysynda bir aıdyń ishinde halyqtyń áleýmettik turǵydan osal toptary turatyn úılerdiń tizimin naqtylaýdy tapsyrdy. 

— Qalyptasqan jaǵdaı órttiń basym bóligi áleýmettik turǵydan az qamtylǵan azamattardyń úılerinde bolatynyn kórsetip otyr. Máselen, ótken jylytý maýsymynda órtten qaza tapqandardyń deni — zeınetkerler, jumyssyzdar, múgedektigi bar adamdar, — dedi úkimet basshysy.

Sondaı-aq, ol áleýmettik turǵyda osal toptardyń baspanasyn erekshe baqylaýǵa alýdy tapsyrdy.

— Óńir ákimdikterine Tótenshe jaǵdaılar mınıstrligimen jáne Eńbek mınıstrligimen birlesip, bir aı ishinde halyqtyń áleýmettik osal toptary turatyn úılerdiń tizimin naqtylaýdy tapsyramyn.

Óńir ákimdikteri osy sanattaǵy adamdardyń úılerin erekshe baqylaýda ustap, olarǵa qajetti qoldaý kórsetsin, — dedi Premer-mınıstr.

Aıta ketý kerek, Úkimettiń búgingi otyrysynda jylytý maýsymyndaǵy órt qaýipsizdigi sharalary pysyqtalyp jatyr.