Oljas Bektenov: Ortalyq Azııa elderi men Japonııa yntymaqtastyqty arttyrýda zor áleýetke ıe
ASTANA. KAZINFORM - Memleket basshysynyń tapsyrmasy boıynsha Premer-Mınıstr Oljas Bektenov «Ortalyq Azııa + Japonııa» dıalogy bıznes-forýmyna qatysty, dep habarlaıdy QR Úkimetiniń baspasóz qyzmeti.
Forým alańynda Ortalyq Azııa aımaǵy elderi men Japonııa delegatsııalarynyń 450-den astam ókili jınaldy. Japonııanyń isker toptarynan Toyota Tsusho Corporation, Mitsubishi Heavy Industries EMEA, Ltd., Mitsui & Co., Ltd iri kompanııalarynyń basshylary men menedjerleri, sarapshylar qaýymdastyǵynan salalyq joǵary oqý oryndarynyń ǵylymı qyzmetkerleri qatysty.
Ekonomıkalyq baılanystardy nyǵaıtý jáne tsıfrlandyrý, kólik-logıstıka salasy, AÓK, aýyr ónerkásip sektory jáne basqa da salalardaǵy ózara is-qımyldy keńeıtý perspektıvalary talqylandy.
Úkimet basshysy Oljas Bektenov óziniń alǵy sózinde kópjaqty yntymaqtastyqty arttyrýdyń negizgi baǵyttaryn atap ótti.
«Japonııa jahandyq aýqymdaǵy ekonomıkalyq jáne tehnologııalyq kóshbasshylardyń biri sanalady. Japon kompanııalarynyń ónimderi óziniń sapasy, senimdiligi jáne ınnovatsııalyq jańashyldyǵymen tanymal. Búkil álemdegi adamdardyń turmys sapasyn jaqsartýǵa baǵa jetpes úles qosyp, progrestiń aldyńǵy qataryna shyqqan memleket.
Óz kezeginde, Ortalyq Azııa – bul qarqyndy damyp kele jatqan aımaq, onyń damý qarqyny joǵary jáne jan-jaqty yntymaqtastyq úshin barlyq jaǵdaı jasalǵan. Bizdiń aımaǵymyzdaǵy elder men Japonııa yntymaqtastyqty údemeli keńeıtý úshin zor áleýetke ıe dep sanaımyn. Japondyq ınvestorlardyń qatysýymen transulttyq jobalardy júzege asyrý aımaqtyń ekonomıkalyq ózara baılanysynyń deńgeıin arttyrýǵa yqpal etetini sózsiz. Búgingi nátıjeli kelissózder bizdiń kópjosparly áriptestigimizdi sapaly jańa deńgeıge shyǵarýǵa baǵyttalǵan», — dep atap ótti Oljas Bektenov.
Premer-Mınıstr Ortalyq Azııa men Japonııanyń ozyq tehnologııalar transferti jáne qosylǵan quny joǵary ónimder óndirý salasyndaǵy ózara is-qımylyna nazar aýdardy. Bul baǵytta birlesken ınnovatsııalyq klasterler, tehnoparkter men ınkýbatorlar qurý múmkindigi atap ótildi.
Búginde Ortalyq Azııa óńirinde memlekettik basqarý sektoryn, fınteh ındýstrııasyn jáne elektrondy kommertsııany aıtarlyqtaı jańǵyrtýǵa múmkindik beretin biregeı ІT ekojúıe qurylýda. Osyǵan baılanysty OA elderiniń Japonııamen jasandy ıntellekt tehnologııalaryn engizý, data-ortalyqtar salý, kıberqaýipsizdikti qamtamasyz etý máselelerindegi yntymaqtastyǵy barlyq tarap úshin jemisti bolýy múmkin, dep atap ótti Úkimet basshysy Oljas Bektenov. Japonııada qoldanylatyn JI, robototehnıka jáne ǵylymnyń basqa da ozyq jetistikterine negizdelgen agrotehnologııalar da qyzyǵýshylyq týdyrýda.
Qarjy sektoryndaǵy ózara is-qımyldy arttyrý jáne aımaqaralyq áriptestikti tereńdetýge Astana halyqaralyq qarjy ortalyǵy men Tokıo qor bırjasy arasyndaǵy áleýetti yntymaqtastyq eleýli úles qosa alady.
Sırek jer metaldy ken oryndaryn ıgerýdegi áriptestikti keńeıtýge jáne kólik-logıstıka salasynda birlesken jobalardy iske asyrýǵa nazar aýdaryldy. Ortalyq Azııanyń soltústikke, ońtústikke, shyǵys pen batysqa shyǵatyn tranzıttik áleýeti japon eksporty men ımportyna úlken múmkindikter ashady.
Bıznes-forýmda «KAZAKH INVEST» UK» AQ basqarma tóraǵasy Erjan Elekeev, Marubeni Corporation Dırektorlar keńesiniń tóraǵasy Fýmııa Kokýbý jáne basqa da qatysýshylar sóz sóıledi.
«Ortalyq Azııa + Japonııa» dıalogy aıasyndaǵy bıznes-forýmnyń nátıjesinde kópjosparly áriptestikti jańa deńgeıge shyǵarýǵa arnalǵan birlesken jobalardy iske asyrý jónindegi qujattarǵa qol qoıylady.
