Oljas Bektenov Orynbor oblysynyń gýbernatory Evgenıı Solntsevti qabyldady
ASTANA. KAZINFORM – Premer-mınıstr Oljas Bektenovtiń Reseı Federatsııasy Orynbor oblysynyń gýbernatory Evgenıı Solntsevpen kezdesýi barysynda saýda-ekonomıkalyq jáne óńiraralyq yntymaqtastyq máseleleri talqylandy. Bul týraly Úkimettiń baspasóz qyzmeti habarlady.
Orynbor oblysy – Qazaqstannyń negizgi shekara mańyndaǵy áriptesteriniń biri. Naqtylanǵan málimetterge sáıkes, 2025 jyly oblyspen Qazaqstan óńirleriniń taýar aınalymy 13,7%-ǵa ósip, $641,7 mln-ǵa jetti, osy jyldyń qańtar-qyrkúıeginde bul kórsetkish $400,5 mln boldy.
— Qazaqstan men Reseı kóshbasshylary arasynda turaqty ári senimge negizdelgen dıalog ornatyldy. Bul eki eldiń, jekelegen óńirler men kásiporyndardyń ekonomıkalyq baılanysyn damytýǵa berik negiz qalaıdy. Ótken jyldyń qorytyndysy boıynsha Qazaqstan men Reseı arasyndaǵy taýar aınalymy shamamen $27 mlrd-qa jetti. Qazirgi tańda memleketter basshylary alǵa qoıǵan mindeti – taýar aınalymyn $30 mlrd-qa deıin jetkizýge jaqyndap kelemiz. Orynbor oblysyna keler bolsaq, bıylǵy kórsetkishter kóńil qýantady, ózara saýda kólemi artyp keledi, $640 mln-nan astamy Orynbor oblysyna tıesili, - dedi Oljas Bektenov.
Orynbor oblysynyń gýbernatory saýda-ekonomıkalyq qatynastardyń turaqty túrde nyǵaıyp kele jatqanyn atap ótip, shekara mańyndaǵy ózara is-qımylǵa erekshe nazar aýdardy.
– Qazaqstan – bizdiń iri saýda seriktesterimizdiń biri. Qazaqstannyń úlesine Orynbor oblysynyń barlyq áriptes óńirlermen jıyntyq syrtqy saýda aınalymynyń shamamen 20%-y nemese besten bir bóligi tıesili. Biz sizderge aýyl sharýashylyǵy ónimderi men ónerkásiptik taýarlar jetkizemiz, Qazaqstannan kabeldik jáne hımııalyq ónimderdi, azyq-túlik ónimderin, tutyný taýarlaryn alamyz. Jyl saıyn ótkizý pýnktteri arqyly jolaýshylar men júk aǵyndary artyp keledi. Ónerkásiptik kooperatsııa erekshe mańyzǵa ıe. Biz AÓK salasyndaǵy ekonomıkalyq baılanystarymyzdy edáýir nyǵaıta alatynymyzǵa senimdimin, - dep atap ótti Evgenıı Solntsev.
Ózara saýdanyń búginde bar áleýetin asha túsýge arnalǵan baǵyttar atap ótildi. Kólik-logıstıkalyq ınfraqurylymdy damytýǵa, avıatsııalyq qatynastardy, ónerkásiptik jáne aýyl sharýashylyǵy kooperatsııasyn keńeıtýge, mádenı-gýmanıtarlyq ózara is-qımylǵa nazar aýdaryldy.
Kezdesý qorytyndysy boıynsha jaýapty memlekettik organdarǵa birlesken bastamalardy júzege asyrý kezinde qajetti járdem kórsetý jóninde birqatar tapsyrma berildi.
Buǵan deıin Bektenov «Halyqtyq qurylys» baǵdarlamasynda otandyq ónimge basymdyq berýdi tapsyrǵanyn jazǵan edik.