Oljas Bektenov Oralda jergilikti kásiporyndardyń tynys-tirshiligimen tanysty
ORAL. KAZINFORM — Úkimet basshysy Oljas Bektenov BQO-ǵa jumys sapary barysynda oblys ákimi Narıman Tóreǵalıevpen birge jergilikti kásiporyndarda boldy.
Oblys ákiminiń orynbasary Qalııar Aıtmuhambetov «Kýbleı» JShS aýmaǵynda Memleket basshysynyń 2028 jylǵa deıin aýyl sharýashylyǵynyń jalpy ónim kólemin eki ese arttyrý jónindegi tapsyrmasyn oryndaý maqsatynda atqarylyp jatqan jumystarǵa toqtaldy.
Onyń sózine qaraǵanda, bıylǵy 1 qazanǵa deıin jalpy ónim kólemi 240,5 mlrd teńgege jetip, 5,8 paıyzǵa artty. Sonyń ishinde mal sharýashylyǵynyń úlesi 60,7 paıyz boldy.
Óńir klımaty mal sharýashylyǵyn damytýǵa qolaıly. Batys Qazaqstan etti mal sany boıynsha respýblıkada 1-orynda. Oblysta jalpy syıymdylyǵy bir mezgilde 45,6 myń mal bolatyn 16 bordaqylaý alańy bar.
— Ónimder qajettiligin tolyq qamtamasyz etý maqsatynda sút baǵytyndaǵy iri qara mal sanyn 35,2 myńǵa, qus sanyn 6 mln deıin kóbeıtý, daqyldar alqabyn 8,3 myń gektarǵa deıin ulǵaıtý kózdelip otyr. Memleket basshysy 2026 jylǵa qaraı qaıta óńdeý úlesin 70 paıyzǵa jetkizýdi tapsyrdy. 2024 jyly 64,5 paıyz bolsa, bıyl 67 paıyzǵa jetedi dep josparlandy. Mal sharýashylyǵynda 35,9 mlrd teńgege 21 joba, ósimdik sharýashylyǵynda 14,4 mlrd teńgege 22 joba jáne qaıta óńdeý salasynda 20,3 mlrd.teńgege 11 joba júzege asyrylady, — dedi Q. Aıtmuhambetov.
Sondaı-aq Batys Qazaqstanda maıly daqyldardy óńdeý, makaron shyǵarý zaýyty, qus fabrıkasy, bordaqylaý alańdaryn salý, teriden mal azyǵyna qospa daıyndaý sekildi iri ınvestıtsııalyq jobalar qolǵa alynbaqshy.
Al «Kýbleı» JShS dırektory Talǵat Berekeshev kásiporynnyń tynys-tirshiligine toqtaldy.
— Otyz jyldan astam ýaqyt boıy mal ónimderin tereń óńdeýmen aınalysyp kelemiz. Osy kezeńde eki zaýyt saldyq. Qazirgi tańda 745 adam jumys isteıdi. Ortasha aılyq eńbekaqy — 380 myń teńge. Aıyna 300 mln astam teńge salyq tólenedi. 200-den astam ónim túrin shyǵaramyz. 2026 jyldan bastap kıik etinen konservi jasamaqpyz. Kúni búgin daıyndyq jumystary júrgizilip jatyr. Ónimder Qyrǵyzstan, Reseı, Túrkııa, Iran, Tájikstan sııaqty elderge eksporttalady, — dedi T. Berekeshev.
Premer-mınıstr QazExpoCentre-Pipe kásipornynda bolǵan kezde BQO ákiminiń orynbasary Tilepbergen Kaıýpov ónerkásip salasynda barlyq kórsetkishter boıynsha oń ilgerileý bar ekendigin atap ótti.
— Sońǵy eki jylda 1,4 trln teńge ınvestıtsııa tartylsa, sonyń 72 paıyzy — jeke ınvestıtsııalar. Bıylǵy birinshi jartyjyldyqtyń qorytyndysy boıynsha tartylǵan tikeleı sheteldik ınvestıtsııa 1,1 mlrd dollarǵa jetti. Bul jóninen Astana men Almatydan keıingi úshinshi orynda turmyz, — dedi T. Kaıýpov.
QazExpoCentre-Pipe basshysy Lázzat Esekeeva otandyq kásiporynnyń áleýetin kóterý baǵytynda joǵary tehnologııaǵa negizdelgen tyń jobalardyń qolǵa alynatynyn jetkizdi.
Osy oraıda Oljas Bektenov kásiporyndar basshylarynyń usynys-tilekteri zerdelenip, óndiris oryndaryna Úkimet tarapynan qoldaý bolatynyn aıtyp, tıisti tapsyrmalar berdi.
Eske sala keteıik, budan buryn Bektenovtiń Qazaqstan-Reseı óńiraralyq yntymaqtastyq forýmyna daıyndyq barysyn teksergenin jazǵan edik.