Oljas Bektenov ońtústik óńirlerdiń elektr energııasy senimdiligin kúsheıtýdi tapsyrdy
ASTANA. KAZINFORM – Búgin Úkimet otyrysynda Premer-mınıstr Oljas Bektenov Energetıka mınıstri Erlan Aqkenjenovke elimizdiń ońtústik óńirleriniń elektr energııasy senimdiligin kúsheıtýdi tapsyrdy.
- 14 tamyz kúni bolǵan jaǵdaıǵa qatysty tekseris ne kórsetti jáne aldaǵy ýaqytta osyndaı jaǵdaılardyń aldyn alý úshin qandaı sharalar qabyldap jatyrsyzdar? - dep suraǵan edi otyrysta Úkimet basshysy mınıstrden.
Saýalǵa jaýap bergen Erlan Aqkenjenovtiń aıtýynsha, elimizdiń ońtústik aımaǵyndaǵy elektr energııasy tapshylyǵyn eskere otyryp, eń birinshi mınıstrlik jańa generatsııa nysandaryn kezeń-kezeńmen iske qosýdy jalǵastyrady.
- Onyń ishinde Almaty qalasyndaǵy JEO-2, JEO-3, al Túrkistan oblysynda qýattylyǵy 1000 MVatt jańa bý-gaz qondyrǵysy paıdalanýǵa beriletin bolady. Sonymen qatar ońtústik aımaq jelileriniń senimdiligin arttyrý úshin Shý-Jambyl-Shymkent qýattylyǵy 500 kılovolt elektr jelisiniń qurylysy jalǵasyp jatyr. Aıaqtalý merzimi – 2027 jyldyń 2-toqsany. Qazirgi tańda oryndalýy 50 paıyzǵa jýyq, - dedi ol.
Mınıstrdiń aıtýynsha, Úkimet basshysynyń tapsyrmasymen memlekettik komıssııa quryldy. Memlekettik komıssııa birneshe kúnnen keıin Premer-mınıstrge qosymsha uımdastyrýshylyq sharalaryn usynady.
- Strategııalyq mańyzy bar baǵyt. Sondyqtan jumystardy kúsheıtý kerek, - dep tapsyrdy osy oraıda Olja Bektenov mınıstrge.
