Oljas Bektenov óńirlerdiń ınfraqurylymdyq jobalaryn jyl sońyna deıin anyqtaýdy tapsyrdy
ASTANA.KAZINFORM – «Halyqtyq qurylys» baǵdarlamasyn iske asyrý úshin jyl sońyna deıin óńirlerdiń ınfraqurylymdyq jáne áleýmettik nysandarǵa qajettiligine taldaý júrgizilip, naqty jobalar tizbesi qalyptastyrylady. Bul týraly Premer-mınıstr Oljas Bektenov Úkimet otyrysynda málimdedi.
Úkimet basshysynyń aıtýynsha, el tarıhyndaǵy eń iri ınfraqurylymdyq jobalardyń biri bolatyn baǵdarlamanyń nátıjesi Úkimet pen ákimdikterdiń úılesimdi jumysyna baılanysty.
– Ónerkásip jáne qurylys, Kólik, Energetıka, Densaýlyq saqtaý jáne Oqý-aǵartý mınıstrlikteri ákimdiktermen birlesip, jyldyń sońyna deıin óńirlerdiń ınfraqurylymdyq jáne áleýmettik nysandarǵa degen qajettiligine taldaý jasap, naqty jobalar tizbesin qalyptastyrýy qajet. Bul jergilikti joldarǵa, turǵyn úı-kommýnaldyq sharýashylyq jelilerine, sondaı-aq bilim berý, mádenıet jáne medıtsına mekemelerine de qatysty, – dedi Oljas Bektenov.
Premer-mınıstr qurylys jumystaryn otandyq materıaldarmen jáne jabdyqtarmen qamtamasyz etýdiń mańyzdylyǵyna da toqtaldy. Osyǵan baılanysty Ónerkásip jáne qurylys mınıstrligine salalyq memlekettik organdarmen birlesip, jobalardy iske asyrýǵa qazaqstandyq óndirýshilerdi keńinen tartý jóninde sharalar qabyldaý tapsyryldy.
Oljas Bektenov Memleket basshysynyń Joldaýynda agroónerkásip keshenin tehnologııalyq jańǵyrtýǵa, otandyq traktorlar men kombaındar óndirisin ulǵaıtýǵa erekshe nazar aýdarylǵanyn atap ótti.
– Osyǵan baılanysty Ónerkásip jáne Aýyl sharýashylyǵy mınıstrlikterine bir aı ishinde fermerler úshin aýyl sharýashylyǵy tehnıkasyn shyǵarýdy arttyrý jóninde naqty usynystar engizýdi tapsyramyn, – dedi Úkimet basshysy.
Sonymen qatar Premer-mınıstr geologııalyq barlaý tásilderin jetildirý jáne strategııalyq mańyzy bar metaldardyń qoryn tıimdi basqarý máselelerine de toqtaldy.
– Ónerkásip mınıstrligi Biryńǵaı jer qoınaýyn paıdalaný platformasynyń júıelerin ıntegratsııalaý men qurylymdaýdy, onyń ishinde jasandy ıntellektini paıdalana otyryp qamtamasyz etýi qajet, – dedi ol.
Úkimet basshysynyń aıtýynsha, tsıfrlyq jáne «jasyl» tehnologııalardyń damýy, sondaı-aq avtomobıl jasaý salasyndaǵy suranystyń artýy sırek kezdesetin metaldardyń mańyzyn kúsheıtip otyr. Osyǵan baılanysty Ónerkásip mınıstrligi mundaı metaldardyń qorlaryn tıimdi basqarýdyń ulttyq júıesin qurýy qajet.
Sonymen qatar 15 jeltoqsanǵa deıin bıznes-qoǵamdastyqpen birlesip, taý-ken metallýrgııa salasyn odan ári damytý jónindegi naqty sharalar ázirlenýge tıis. Onyń ishinde ónimderge kepildik berilgen suranysty qamtamasyz etetin offteık-kelisimsharttar tetigin qoldaný kózdelgen.
Budan bólek, Ónerkásip jáne qurylys mınıstrligi óńir ákimdikterimen birlesip, buryn qabyldanǵan zańnamalyq normalardy iske asyrý jóninde sharalar qabyldap, óńirlerdiń klasterlik damýy boıynsha kelisilgen sheshimder ázirleýi qajet.
Aıta keteıik, Oljas Bektenov Pezıdent jarııalaǵan «Halyqtyq qurylys» azamattardyń ál-aýqatynyń artýyna serpin beredi.
