Oljas Bektenov óńirlerde sý polosy klýbtaryn ashý usynysyn qoldady
ASTANA. KAZINFORM – Óńir ákimdikteriniń qoldaýymen sý polosy klýbtaryn ashý kerek. Bul týraly búgin Úkimet otyrysynda Qazaqstan Sý sporty túrleri federatsııasynyń bas hatshysy Dmıtrıı Balandın aıtty.
- Sý polosy lıgasyn qurý josparlanyp otyr. Osy oraıda paıdalanyp, óńirlerde sý polosy klýbtaryn ashýǵa ákimderdiń qoldaýyn qalar edim. Lıga basketbol men voloeıboldan qoldanystaǵy ulttyq lıgalar qaǵıdaty boıynsha qalyptastyrylady. Bul jarys deńgeıin arttyryp, klýbtyq damýdyń turaqty júıesin qalyptastyrady jáne jastardyń sporttyń komandalyq túrlerine nazaryn aýdartady, - dedi Dmıtrıı Balandın.
Sonymen qatar ol federatsııa halyqty sý sporty túrlerine tartýǵa jáne júzý mádenıetin qalyptastyrýǵa baǵyttalǵan baǵdarlamalardy belsendi túrde júzege asyryp jatqanyn aıtty.
- Tanymal sportshylar men jattyqtyrýshylardyń qatysýymen sheberlik sabaqtary ótkiziledi. Jappaı júzý men festıvalder uıymdastyrylady. Múmkindigi shekteýli jandardy júzý baǵdarlamasyna tartý úshin jaǵdaı jasalyp jatyr. World Aquatics halyqaralyq standarttary boıynsha jattyqtyrýshylardyń biliktiligin arttyrýǵa aıryqsha nazar aýdarylady. Bul sportshylardyń daıyndyq sapasyn, sabaqtardaǵy qaýipsizdik deńgeıin arttyrady, - dedi ol.
Osy oraıda Úkimet basshysy Oljas Bektenov óńirlerde sý polosy klýbtaryn ashý usynysyna qoldaý bildirdi.
- Barlyq ákim estip otyr, sizdiń óńirlik sý polosy klýbtaryn ashý usynysyńyzǵa qoldaý bildiredi dep oılaımyn, - dedi Premer-mınıstr.
Aıta keteıik, 2026 jyly Almaty men Astana qalasynyń orta bilim baǵdarlamasyna júzý engizilmek.