Oljas Bektenov oblys ákimderine bala quqyǵyn qorǵaý basqarmalaryn qurýdy 2 aıda aıaqtaýdy tapsyrdy
ASTANA. KAZINFORM – Elimizdiń 16 oblysy men 2 respýblıkalyq mańyzy bar qalasynda áli kúnge bala quqyqtaryn qorǵaý basqarmalary qurylmaǵan. Bul týraly búgin Úkimet otyrysynda Premer-mınıstr Oljas Bektenov aıtty.
- Balalardyń quqyqtaryn qorǵaý deńgeıin arttyrý maqsatynda qamqorshylyq organdary mamandarynyń jańa shtattyq normatıvi engizildi. Ol 1 jyl ishinde mamandar sanyn 3 eseden astam arttyrýǵa múmkindik berdi. Osy mamandar qatarynan ár óńirde bala quqyqtaryn qorǵaý basqarmalary qurylyp jatyr. Alaıda óńirlerdiń kópshiliginde bul iske tıisti kóńil bólinbeı keledi. Aqmola, Aqtóbe oblystarynda jáne elordada ǵana nátıjeli jumys júrgizildi. Qalǵan óńir ákimdikterine eki aı ishinde bala quqyqtaryn qorǵaý basqarmalaryn qurý isin aıaqtaýdy tapsyramyn, - dedi Oljas Bektenov.
Úkimet basshysynyń atap ótýinshe, ótken jyldyń 1 shildesinen bastap otbasyna ornalastyrýdyń jańa nysany – balany qabyldaıtyn kásibı otbasy engizildi.
- Olardy qamtamasyz etýge tıisti qarajat kózdelgen. Alaıda birde-bir oblysta jumys júrgizilgen joq. Óńir ákimdikterine osy baǵytta jumysty jandandyrýdy tapsyramyn, - dedi Premer-mınıstr.
Buǵan deıin Juldyz Súleımenova «Qazaqstan balalary» tujyrymdamasyn tanystyrǵanyn jazǵan edik.