Oljas Bektenov munaı ındýstrııasynyń 125 jyldyǵyna oraı Prezıdenttiń atynan sala ardagerlerine marapattar tabys etti
ASTANA. KAZINFORM – Premer-Mınıstr Oljas Bektenov qazaq dalasynda munaı óndirisiniń bastalǵanyna 125 jyl tolýyna oraı munaı-gaz kesheniniń ardagerleri men qyzmetkerlerin quttyqtap, el ekonomıkasy qurylymyndaǵy salanyń mańyzyn atap ótti.
Úkimet basshysy marapattaý rásimine qatysýshylar aldynda sóılegen sózinde Qazaqstandy álemdik energetıka naryǵyndaǵy jetekshi oıynshylar qataryna qosqan sala ardagerleri, munaıshylar, ınjenerler men ǵalymdardyń janqııarlyq eńbegi men qajyr-qaıraty úshin alǵysyn bildirdi.
Premer-Mınıstr munaı-gaz sektoryn damytýǵa qosqan úlesi úshin Memleket basshysynyń atynan eńbegimen erekshe kózge túsken munaı-gaz kesheniniń 40 qyzmetkerine marapat tabys etti. «Parasat» ordenimen eńbek ardageri Mahash Rahmetov, munaıshy ardager Oleg Gershtanskıı, sala sarapshysy Mahambet Dosmuhambetov, «Qurmet» ordenimen munaıshy ardagerler Tóremurat Jarmaǵambetov, Rahman Isaev, Madyhat Nurmuhanov, Naǵanǵalı Óteev, qubyrshy Marat Taǵanbaev, Shakımurat Shamarov, IІI dárejeli «Eńbek Dańqy» ordenimen ardager munaıshy Keltir Shanenov, tehnologııalyq kompressorlar mashınısi Ahmed Shadınov, «Eren eńbegi úshin» medalimen munaıshy ardagerler Ábdirahman Qazıev, Qadyrhan Ótesinov, slesar-jóndeýshi Esimbek Berdalıev, munaı jáne gaz operatory Kósherbaı Ótebaev jáne basqa da qyzmetkerler marapattaldy.
Oljas Bektenov elimizde «qara altynnyń» aıtarlyqtaı qory bar ekenin atap ótti. Rastalǵan munaı qory 4 mlrd tonnadan asady, bul kólemmen Qazaqstan álemdik naryqtaǵy mańyzdy oıynshylardyń birine aınalady. Munaı eksportynyń jańa baǵyttary ashyldy, onyń ishinde Kaspıı baǵyty bar. Elimiz arqyly munaı men gaz tranzıtiniń kólemi artyp keledi. Qazaqstannyń ulttyq KEBCO munaı brendi iske qosyldy, resýrstyq bazany keńeıtý, geologııalyq barlaýdyń ınvestıtsııalyq tartymdylyǵyn arttyrý, óndiristi ulǵaıtý, jańa jobalardy iske asyrý boıynsha belsendi jumys júrgizilip jatyr.
«Memleket basshysy Qazaqstan halqyna Joldaýynda munaı-gaz hımııasy salasyn odan ári damytý mindetterin atap ótti. Saladaǵy jetistikterimiz munaı óndirý jáne ony tasymaldaýmen ǵana shektelmeıdi. Kómirsýtekterdi ishki óńdeý salasyn damytýǵa kóp kúsh jumsalady. Atyraý oblysynda polıpropılen óndiretin zaýyttyń ashylýymen tolyqqandy munaı-gaz hımııasy klasteri quryldy. Alda polıetılen jáne býtadıen shyǵaratyn jańa jobalar tur. Atalǵan kásiporyndar ımportty almastyrýǵa yqpal etip qana qoımaı, shaǵyn jáne orta bıznesti damytý úshin qajetti jaǵdaı jasaıdy. Aldaǵy jyldary jańa gaz óńdeý zaýyttary salynady. Munaı-gaz kesheni keleshekte de ekonomıkamyzdyń qozǵaýshy kúshiniń biri bolyp qala bermek. Biz salany ınnovatsııalyq tehnologııalardy engizý arqyly jáne ekologııalyq qaýipsizdikti qamtamasyz ete otyryp, odan ári damytýdy kózdeımiz», — dep atap ótti Oljas Bektenov.
Otandyq munaı-gaz hımııasyn damytý jáne polıetılen, polıetılentereftalat jáne karbamıd óndirý jobalaryn iske asyrý ishki suranysty qanaǵattandyrýǵa jáne qosylǵan quny joǵary otandyq tehnologııalyq ónim eksportyn arttyrýǵa múmkindik beredi.
