Oljas Bektenov Mınskide Eýrazııalyq úkimetaralyq keńes otyrysyna qatysty
ASTANA. KAZINFORM - Mınsk qalasynda Qazaqstan Respýblıkasynyń Premer-mınıstri Oljas Bektenov Belarýs Respýblıkasynyń Prezıdenti Aleksandr Lýkashenkonyń Táýelsiz Memleketter Dostastyǵy úkimetteri men Eýrazııalyq úkimetaralyq keńes basshylarynyń otyrystaryna qatysýshylarmen ujymdyq kezdesýine, sondaı-aq shaǵyn jáne keńeıtilgen quramdaǵy EÚAK otyrysyna qatysty.
Belarýs Respýblıkasynyń Prezıdentimen ujymdyq kezdesý barysynda ózara saýda men ekonomıkalyq baılanystardy damytý máseleleri talqylandy. Ónerkásiptik yntymaqtastyqty tereńdetýge jáne keleshegi zor salalarda birlesken ınnovatsııalyq jobalardy júzege asyrýǵa nazar aýdaryldy.
Eýrazııalyq úkimetaralyq keńes otyrysyna Belarýs Respýblıkasynyń Premer-mınıstri Aleksandr Týrchın, Qyrǵyz Respýblıkasy Prezıdenti Ákimshiliginiń basshysy – Mınıstrler kabınetiniń tóraǵasy Adylbek Kasymalıev, Reseı Federatsııasy Úkimetiniń tóraǵasy Mıhaıl Mıshýstın, Armenııa Respýblıkasynyń vıtse-premer-mınıstri Mger Grıgorıan (beınekonferentsııa arqyly), EAEO janyndaǵy baqylaýshy elderden – Ózbekstan Respýblıkasynyń Premer-mınıstri Abdýlla Arıpov, Iran Respýblıkasynyń ónerkásip, shahta jáne saýda mınıstri Seıed Mohammad Tabak, Kýba Respýblıkasynyń ónerkásip mınıstri Eloı Alvares Martınes, is-sharaǵa shaqyrylǵan elderden – Ázerbaıjan Respýblıkasynyń Premer-mınıstri Alı Asadov qatysty. Sondaı-aq EEK alqasynyń tóraǵasy Baqytjan Saǵyntaev, TMD Bas hatshysy Sergeı Lebedev jáne basqa da ókilder qatysty.
Shaǵyn quramda 2025 jylǵy 31 qańtarda ótken EÚAK otyrysynda berilgen tapsyrmalardyń oryndalý barysy qaraldy. Birqatar uıymdastyrýshylyq másele sheshildi.
Keńeıtilgen quramda qatysýshylar EAEO-nyń ıntegratsııalanǵan aqparattyq júıesin, kólik ınfraqurylymyn damytý jáne taǵy da basqa máseleler boıynsha pikir almasty.
Qazaqstan Premer-mınıstri Oljas Bektenov óz sózinde ekonomıkalyq úderisterdi tereńdetýge basa nazar aýdardy. Kooperatsııada, kólik-tranzıttik jáne tsıfrlyq salalarda eleýli áleýet bary atap ótildi.
EAEO-nyń jahandyq ekonomıkadaǵy ustanymyn nyǵaıtýdyń mańyzdy sharty – halyqaralyq yntymaqtastyq jáne jańa naryqtarǵa shyǵý úshin qolaıly jaǵdaı jasaý.
Jıynda azyq-túlikpen qamtamasyz etý jáne ornyqty damýdyń strategııalyq negizi retinde agroónerkásip keshenine arnaıy nazar aýdaryldy. Buǵan deıin birlesken ónerkásiptik jobalar salasynda qoldanylyp kelgen EAEO bıýdjeti esebinen aýyl sharýashylyǵy salasyna qarjylaı járdemdesý tetikterin tartý máselesi pysyqtaldy. Bul tásil ozyq tehnologııalardy engizýdi jedeldetip, turaqty jetkizý tizbegin nyǵaıtady jáne EAEO elderi ónimderiniń syrtqy naryqtardaǵy básekege qabilettiligin arttyrady.
Óz kezeginde, tehnıkalyq reglamentterdi ázirleý salasyndaǵy tsıfrlandyrý jumystary qaýipsizdikke qoıylatyn biryńǵaı talaptardy ózektendirýge, jedeldetýge jáne ashyqtyǵyn arttyra túsýge septigin tıgizedi. Al birlesken «Tsıfrlyq tehnıkalyq retteý» jobasyn júzege asyrý ıntegratsııaǵa jańa serpin beredi.
«Qazaqstan Prezıdenti Qasym-Jomart Kemeluly Toqaev taıaýdaǵy Joldaýynda aldaǵy úsh jyl ishinde Qazaqstandy shynaıy tsıfrlyq elge aınaldyrý týraly strategııalyq mindet qoıdy. Qazaqstan Úkimeti qazir tsıfrlandyrý, jasandy ıntellekt tehnologııalaryn engizý boıynsha qarqyndy jumystar júrgizýde. Biz jaqyn arada Alem.ai halyqaralyq jasandy ıntellekt ortalyǵyn ashamyz, ol tsıfrlyq ekonomıkany, shyǵarmashylyq ındýstrııany ilgeriletýde jáne jasandy ıntellekt ekojúıesin qurýda draıverge aınalmaq. Qazaqstandyq IT sheshimderdiń eksportyn ulǵaıtý boıynsha da jumys istep jatyrmyz. Barlyq áriptesimdi JI salasyndaǵy jobalardy qarqyndy júzege asyrýǵa shaqyramyn. Bul biz ázirlep jatqan Jol kartasynda eleýli oryn alýy tıis», — dep atap ótti Oljas Bektenov.
EÚAK otyrysynyń qorytyndysy boıynsha birqatar qujatqa qol qoıyldy. Qabyldanǵan sheshimder ónerkásiptik jáne agroónerkásiptik kooperatsııany, tsıfrlyq yntymaqtastyq quraldaryn damytýǵa, ótkizý naryqtaryn keńeıtýge jáne Odaqqa múshe memleketterdiń ekonomıkalyq ornyqtylyǵyn nyǵaıtýǵa baǵyttalǵan.
Eýrazııalyq úkimetaralyq keńestiń kelesi otyrysy osy jyldyń jeltoqsan aıynda Máskeý qalasynda (Reseı Federatsııasy) ótedi.
Osyǵan deıin Oljas Bektenovtiń Mınskide «INNOPROM.Belarýs» halyqaralyq ónerkásip kórmesin aralap, «Jańa tehnologııalar odaǵy: bolashaq ónerkásipti qurý» taqyrybyndaǵy plenarlyq sessııada sóz sóılegeni týraly jazdyq.