Oljas Bektenov Mınskide Aleksandr Lýkashenkomen kezdesti
ASTANA. KAZINFORM – Qazaqstan Respýblıkasynyń Premer-mınıstri Oljas Bektenov Belarýs Respýblıkasyna resmı saparmen bardy. Sapar aıasynda Úkimet basshysyn Belarýs Prezıdenti Aleksandr Lýkashenko qabyldady, dep habarlaıdy Úkimettiń baspasóz qyzmeti.
Oljas Bektenov Aleksandr Lýkashenkoǵa Qazaqstan Prezıdenti Qasym-Jomart Toqaevtyń ystyq sálemi men izgi tilegin jetkizdi.
Kezdesýde Qazaqstan men Belarýs arasyndaǵy uzaq jyldarǵa negizdelgen dostyq, ózara qurmet pen joǵary deńgeıdegi senimge arqaý bolǵan qarym-qatynastardyń qazirgi jaı-kúıi talqylandy. Eki memleket basshylary arasyndaǵy turaqty dıalog ekijaqty yntymaqtastyqty odan ári damytýdyń mańyzdy negizi ekeni atap ótildi.
Úkimetaralyq kelissózder barysynda Oljas Bektenov pen Belarýs Premer-mınıstri Aleksandr Týrchın saýda-ekonomıkalyq jáne ınvestıtsııalyq yntymaqtastyqty damytý, ónerkásip kooperatsııasy, kólik-tranzıt salasyndaǵy ózara is-qımyl jáne birlesken jobalardy júzege asyrý máselelerin qarastyrdy.
– Belarýs – Qazaqstan úshin ýaqyt synynan ótken senimdi seriktes. Bizdi uzaq jylǵy ortaq tarıhymyz, ózara qurmet, sondaı-aq Qazaqstan Prezıdenti Qasym-Jomart Toqaev pen Belarýs Prezıdenti Aleksandr Lýkashenkonyń arasyndaǵy úlken senim men turaqty baılanystarǵa negizdelgen qatynastarymyz baılanystyrady. Bizdiń úkimetterimizdiń mindeti – kóshbasshylarymyz arasyndaǵy qol jetkizilgen ýaǵdalastyqtardy qarqyndy túrde júzege asyrý. Bul baǵytta oń dınamıka bar. Ózara is-qımyldy odan ári ulǵaıta túsýge, jetkiziletin ónimderdiń, onyń ishinde temirjol mashınasyn jasaý salasyndaǵy tizbesin keńeıtýge tyń múmkindikter bar, – dedi Oljas Bektenov.
2025 jyldyń qorytyndysynda Qazaqstan men Belarýs arasyndaǵy taýar aınalymy shamamen 1,2 mlrd dollardy qurady. Bıylǵy jeti aıda bul kórsetkish 723 mln dollarǵa jetti. Ótken jyly ózara saýda 27,7%, al bıylǵy jeti aıda 20% ósken.
Ónerkásiptik kooperatsııa aıasynda quny 200 mln dollardan asatyn 13 birlesken joba júzege asyryldy. Qazaqstanda «Belarýs» traktorlary, «Gomselmash» kombaındary, avtomobıl jáne basqa da tehnıka óndirisi jolǵa qoıylǵan.
Agroónerkásip keshenindegi yntymaqtastyq ta talqylandy. Qazaqstan Belarýs naryǵyna kúnbaǵys, maqsary jáne raps maılaryn, sondaı-aq daıyn bakaleıa ónimderin jetkizýdi ulǵaıtýǵa daıyn ekenin bildirdi.
Kólik-tranzıt salasynda bıylǵy jeti aıda eki el arasyndaǵy temirjol tasymaly 18,7% ósip, 4,8 mln tonnaǵa jetti. Taraptar logıstıkalyq baǵyttardy odan ári damytý perspektıvasyn qarastyrdy.
Kelissózder qorytyndysynda Qazaqstan men Belarýs óńirleri arasyndaǵy saýda-ekonomıkalyq, ǵylymı-tehnıkalyq jáne mádenı yntymaqtastyqty damytýǵa baǵyttalǵan birqatar qujatqa qol qoıyldy.
Aıta keteıik, bıyl sáýir aıynda Qasym-Jomart Toqaev pen Aleksandr Lýkashenko telefon arqyly sóılesip, Qazaqstan men Belarýs arasyndaǵy qarym-qatynastyń júıeli damyp kele jatqanyn jáne yntymaqtastyqtyń barlyq baǵyty boıynsha oń dınamıka bar ekenin atap ótken edi.
