Oljas Bektenov metallýrgııadaǵy óndiris kólemin ulǵaıtýdy tapsyrdy
ASTANA. KAZINFORM – Qazaqstannyń jahandyq qun tizbeginiń orta býynyndaǵy rólin nyǵaıtý mańyzdy. Bul týraly Úkimet otyrysynda Premer-Mınıstr Oljas Bektenov aıtty.
«Metallýrgııada jyl sońyna deıin bolat quıý, jalpaq prokat jáne shoıyn óndirisi kásiporyndarynyń ónim kólemin ulǵaıtý qajet. Bul sektordy damytý úshin Sırek jáne jerde sırek kezdesetin metaldar salasyn damytýdyń 2028-shi jylǵa deıingi keshendi jospary bekitildi. Onda ınvestıtsııalar men óndiris kólemin 40 paıyzǵa arttyrý kózdelgen», - dedi Úkimet basshysy.
Sondyqtan Oljas Bektenov Ónerkásip mınıstrligine atalǵan baǵyttaǵy jumysty aıtarlyqtaı kúsheıtý qajettigin eskertti.
«Qazaqstannyń jahandyq qun tizbeginiń orta býynyndaǵy rólin nyǵaıtý mańyzdy. Ol úshin Ónerkásip mınıstrligi bıznes-qoǵamdastyqpen birge mıneraldyq bazany ulǵaıtý, zamanaýı tehnologııalardy engizý jáne qoldanystaǵy óndiristerdi keńeıtý jóninde tıisti sharalar qabyldaýy qajet», - dedi ol.