Oljas Bektenov memlekettik-jekeshelik áriptestikti basqasha júrgizýdi usyndy
NUR-SULTAN. QazAqparat - QR Memlekettik qyzmet isteri jáne sybaılas jemqolyqqa qarsy is-qımyl agenttigi tóraǵasynyń orynbasary Oljas Bektenov memlekettik-jekeshelik áriptestik júıesin ózgertýdi usyndy, dep habarlaıdy QazAqparat tilshisi.
«Memlekettik-jekeshelik áriptestik kezinde kásipkerdiń ınvestıtsııalyq shyǵyndary óteledi. Negizi, ondaı júıeniń merdigerlikten esh aıyrmashylyǵy joq. Bir ózgesheligi, ol shyǵyndardy asyqpaı qaıtarýǵa múmkindik bar. Sol jaǵynan memleketke tıimdi shyǵar. Biraq ınvestıtsııalyq shyǵyndardy óteý merzimi qysqa bolsa, nesi tıimdi? Máselen, úsh jyl deıik, kásipker kelip, óz aqshasyn salady. Al úsh jylda onyń barlyq shyǵyndaryn marjamen birge qaıtarý qajet. Oǵan qosa, salynǵan nysan kásipkerdiń ózinde qalady», - dedi O.Bektenov «Atameken» UKP kásipkerlerdiń quqyqtaryn qorǵaý jónindegi keńestiń kezekti otyrysynda.
Onyń oıynsha, memlekettik-jekeshelik áriptestiktiń tıimdi tustary eki jaqqa da ortaq bolýy qajet. «Mysaly, biz bylaı istedik, aldymen kúrdeli jóndeýdi qajet etetin balabaqshalardyń tizimin jasap shyqtyq. Sosyn bıznesmenderge jóndeý jumystaryn jasaýdy usyndyq. Olar ol shyǵyndardy óz moınyna aldy. Sonyń ornyna biz memlekettik tapsyrysty uzartyp berdik. Menińshe, bul ózara tıimdi seriktestik. Al ınvestıtsııalyq shyǵyndardy óteıtin bolsaq, ózara tıimdi áriptestiktiń bolýy ekitalaı. Máselen, memleket óz tarapynan ınfraqurylymdy tartyp beredi. Bıznes bolsa, óz aqshasyna nysan salady. Mine, ózara tıimdi memlekettik-jekeshelik seriktestik dep osyny aıtýǵa bolady», - dep atap kórsetti O.Bektenov.
Memlekettik-jekeshelik áriptestik salasynda ákimshilik kedergiler de az emes. Al sheneýnikter barlyq jumysty op-ońaı qaǵazbastylyqqa aınaldyryp jibere alady. Sóıtip, kásipkerdiń ınvestıtsııalyq shyǵyndary da, operatsııalyq shyǵyndary da ótelmeı qalýy múmkin. Oǵan qosa, memlekettik-jekeshelik áriptestik konkýrstary áli kúnge deıin qaǵaz júzinde ótkiziledi. «Men bul máseleni jaqsy bilemin. Óıtkeni oblys ákiminiń orynbasary bolǵanda memlekettik-jekeshelik áriptestik máselelerimen aınalystym. Shyny kerek, sheshilmeı jatqan problemalar barshylyq. Máselen, búginde memlekettik satyp alýlar tolyǵymen elektrondy túrde júrgizilse, memlekettik-jekeshelik áriptestik konkýrstary áli kúnge deıin qaǵaz júzinde atqarylady. Konvertti skotchpen orap ákeledi de, komıssııa músheleriniń talqysyna salady. Eshqandaı tártip joq. Al tártip joq jerde sybaılas jemqorlyqtyq qaýipi joǵary. Kásipker mańyzdy bir jobany iske asyramyn dese de, sheneýnik ony ary-beri júgirtip, barlyq josparyn jermen jeksen etýi múmkin. Sebebi bıznesmen onyń tanysy da emes, týysy da emes», - deıdi O.Bektenov.
Aıta keteıik, búgingi otyrysta keńes tóraǵasy Qaıyrbek Súleımenov osy saladaǵy ákimdikterdiń qıturqy áreketin ashyp berdi. Jergilikti bılik organdary óz basymdyǵyn paıdalanyp, qosymsha jeńildikterdi shyǵaryp alady. Sodan memlekettik-jekemenshik áriptestiktiń tepe-teńdigi buzylady. Óıtkeni kásipkerlerge artyq shyǵyn shyǵarýǵa týra keledi. Tipti, birlesip jasaǵan jobany tartyp alý faktileri de bar «Mysaly, men Pavlodardan kelgen bir kásipkerdi qabyldadym. Ol memlekettik-jekemenshik áriptestik negizinde mektep salyp shyqty. Іshinde sport zal da bar. Tabysty jumys istep jatqan mektep deıdi. Aqyry ol mektebin tartyp aldy. Endi, zańdy túrde alyp qoıdy ma, ony áli zerdelep shyǵý kerek. Ol kásipker zańdy buzǵan shyǵar. Degenmen, kásipker bárin óz aqshasyna saldy, mektepti qurdy, artynan sonyń bárin alyp qoıǵan durys emes qoı. Bir qyzyǵy, dál sol jerde báribir mektepti ashyp otyr», - dedi Q.Súleımenov.
