Oljas Bektenov Memleket basshysynyń tapsyrmalaryn oryndaý boıynsha keńes ótkizdi

ASTANA. KAZINFORM - Premer-mınıstr Oljas Bektenov Memleket basshysynyń Qaýipsizdik Keńesi otyrysynda bergen tapsyrmalaryn oryndaý boıynsha Kólik, Qarjy mınıstrlikteri basshylyǵynyń, «Samuryq-Qazyna» qory, «Qazaqstan temir joly» ulttyq kompanııasy, Ulttyq qaýipsizdik komıteti Shekara qyzmeti ókilderiniń qatysýymen keńes ótkizdi. Bul týraly Úkimettiń baspasóz qyzmeti habarlady.

Prezıdent tarapynan aıtylǵan syndy eskere otyryp, negizgi ınfraqurylymdyq jobalardy júzege asyrý merzimderin qysqartý máseleleri qaraldy. Qazaqstan aýmaǵynda ornalasqan ótkizý pýnktterin jańǵyrtý boıynsha kórshi eldermen ýaǵdalastyqtardy sapaly ári ýaqytyly iske asyrýǵa nazar aýdaryldy.

Elimizdiń naryǵyn qoljetimdi baǵadaǵy avıatsııalyq otynmen qamtamasyz etý úshin otandyq munaı óńdeý zaýyttaryn jańǵyrtýdy jedeldetý týraly sheshim qabyldandy.

Premer-mınıstr «jasyl dálizderdi» uıymdastyrý jáne tıimdiligin arttyrý jónindegi jumystardyń nátıjeleri azamattar men bıznes úshin aıqyn bolýy tıis ekenin atap ótti. Tıisti organdarǵa tranzıttik júkter úshin kedendik tekserýsiz tetikti engizý tapsyryldy.

Syrtqy qazaqstandyq termınaldardy qalyptastyrý boıynsha jumystar júrgizilip jatyr.

Prezıdenttiń tapsyrmalaryn eskere otyryp, temirjol (20,5%) jáne qubyr kóligimen (19,5%) júk tasymaldaý kóleminiń ulǵaıýy aıasynda Kólik, Qarjy mınıstrlikterine múddeli uıymdarmen birlesip bir apta merzimde saýda jáne tranzıt aǵynyna áser etetin basym jobalardy qarjylandyrýdy qamtamasyz etý tapsyryldy.

Premer-mınıstrdiń birinshi orynbasary Roman Sklıarǵa eki kún merzimde jergilikti jerlerdegi jumystardy baqylaý maqsatynda óńirlerge baryp, Memleket basshysynyń tapsyrmalaryn oryndaý jónindegi is-sharalardyń egjeı-tegjeıli josparyn daıyndaý tapsyryldy.

Aıta keteıik, Prezıdent kólik salasyndaǵy kemshilikter úshin Marat Qarabaevqa sógis jarııalady.