Premer-mınıstr mektepterdi jóndeý jumysy baıaý júrip jatqan óńirlerdi atady

ASTANA. KAZINFORM – Mektepterdegi úsh aýysymdy oqytý máselesi de  birtindep sheshimin taýyp keledi. Bul týraly Úkimet otyrysynda Premer-mınıstr Oljas Bektenov aıtty.

– Balalardyń sapaly bilim alýyna qolaıly jaǵdaı jasaý máselesi Memleket basshysynyń erekshe nazarynda. Otanshyl, bilimdi ári jasampaz urpaq tárbıeleý – memlekettik saıasattyń negizgi basymdyǵy. Oqýshylar men stýdentterdiń jaıly oqýyn qamtamasyz etý úshin bilim berý mekemelerin salý jáne jańǵyrtý jumystary qyzý júrip jatyr. Qyrkúıek aıynda 115 myń jańa oqýshy ornyna arnalǵan 83 jańa mektep ashý josparlanýda. Onyń ishinde «Keleshek mektepteri» ulttyq jobasy aıasynda 57 bilim oshaǵy paıdalanýǵa beriledi. Olardyń tolyqqandy jumysqa daıyndyǵyn qamtamasyz etý mańyzdy mindet sanalady. Mektepterdegi úsh aýysymdy oqytý máselesi de birtindep sheshimin taýyp keledi. Ulttyq joba aıasynda elimizdiń 9 óńirinde 15 nysandy aıaqtaý boıynsha jumystardy jedeldetý qajet. «Samuryq-Qazyna» qory ákimdiktermen birge nysandardyń jańa oqý jylyna deıin paıdalanýǵa berilýin qamtamasyz etsin, - dedi Oljas Bektenov.

Úkimet basshysy elimizdiń mektepterinde kúrdeli jáne aǵymdaǵy jóndeý jumystaryn 1 qyrkúıekke deıin aıaqtaý qajettigin basa aıtty.

– Birqatar óńirde 34 mektep boıynsha jumys qarqyny baıaý ekenin atap ótemin. Bular – Almaty qalasy, Abaı, Batys Qazaqstan, Qyzylorda, Atyraý, Aqtóbe, Shyǵys Qazaqstan, Ulytaý jáne Almaty oblystary. Atalǵan óńir ákimderi jóndeý jumystarynyń sapasy men merziminde oryndalýyn tikeleı baqylaýǵa alsyn. Sonymen qatar fızıka, hımııa, bıologııa, robototehnıka sııaqty arnaýly kabınetterdi der kezinde satyp alý da ózekti. Qyrkúıek aıyna deıin taǵy da keminde 200 pándik kabınetti jabdyqtaý qajet, - dedi ol.

Aıta keteıik, elimizde 267 myń orynǵa arnalǵan 232 mektep salynyp jatyr.