Oljas Bektenov Máskeýde ótken Eýrazııalyq úkimetaralyq keńestiń otyrysyna qatysty
ASTANA. KAZINFORM - Premer-mınıstr Oljas Bektenov Máskeý qalasynda (Reseı Federatsııasy) ótken Eýrazııalyq úkimetaralyq keńestiń otyrysyna qatysty. Shaǵyn jáne keńeıtilgen quramda EÚAK qatysýshylary saýda-ekonomıkalyq yntymaqtastyqty, ónerkásip kooperatsııasyn damytý, sondaı-aq energetıka, tsıfrlyq, keden sııaqty basqa da salalardaǵy ózara is-qımyl máselelerin talqylady. Bul týraly Úkimettiń baspasóz qyzmeti habarlady.
Jıynǵa Armenııa Respýblıkasynyń Premer-mınıstri Nıkol Pashınıan, Belarýs Respýblıkasynyń Premer-mınıstri Aleksandr Týrchın, Qyrǵyz Respýblıkasy Mınıstrler kabınetiniń tóraǵasy – Prezıdent Ákimshiliginiń basshysy Adylbek Kasymalıev, Reseı Federatsııasy Úkimetiniń tóraǵasy Mıhaıl Mıshýstın, Ózbekstan Respýblıkasynyń Premer-mınıstri Abdýlla Arıpov, beınekonferentsııa arqyly Kýba Respýblıkasynyń Premer-mınıstri Manýel Marrero Krýs, sondaı-aq Eýrazııalyq ekonomıkalyq komıssııa alqasynyń tóraǵasy Baqytjan Saǵyntaev qatysty.
Delegatsııa basshylary bıylǵy birlesken is-sharalar jáne 2026 jylǵa arnalǵan EAEO sheńberindegi ıntegratsııa men áriptestiktiń basym baǵyttary týraly pikir almasty. Munaı-gaz salasyndaǵy yntymaqtastyq, kedendik baqylaý tetikterin jetildirý, elektrondy saýda, taýarlardy tańbalaý júıesin damytý jáne basqa da máselelerge nazar aýdaryldy.
QR Premer-mınıstri Oljas Bektenov óz sózinde ekonomıkanyń negizgi salalarynda oń serpindi qamtamasyz etken yntymaqtastyqtyń is-júzindegi nátıjelerin atap ótti.
– Memleket basshysy Qasym-Jomart Toqaev EAEO týraly shartty jan-jaqty oryndaý jáne úshinshi eldermen syrtqy ekonomıkalyq yntymaqtastyqty keńeıtý qajettigin atap ótti. Jalpy, EAEO uıymy jumys isteı bastaǵan ýaqyttan beri Qazaqstannyń múshe memlekettermen ózara saýda kólemi 90%-ǵa ósti. Biz ekonomıkalyq yntymaqtastyqty nyǵaıtýǵa, kedergilerdi joıýǵa jáne ózara saýdany damytýǵa baǵyttalǵan birlesken jumystyń serpinin saqtaýymyz qajet, — dep atap ótti Oljas Bektenov.
EAEO elderi bıyl ıntegratsııany nyǵaıtýǵa jáne memleketterdiń ornyqty ekonomıkalyq ósimin qamtamasyz etýge yqpal etetin birqatar qujatty qabyldady. «IV Úlken» Hattamaǵa qol qoıý bazalyq Shartty jetildirýge jáne EAEO ınstıtýttarynyń qyzmetin odan ári damytýǵa baǵyttalǵan. Syrtqy ekonomıkalyq baılanystardyń keńeıýine BAÁ, Mońǵolııa jáne Indonezııamen halyqaralyq kelisimder jasasý yqpal etpek.
Otyrysqa qatysýshylar memlekettik satyp alýdy tsıfrlandyrý salasyndaǵy birlesken jumysqa basa nazar aýdardy. Halyqaralyq zertteýler derekteri boıynsha Qazaqstannyń ulttyq memlekettik satyp alý júıesi qoljetimdilik pen ashyqtyq deńgeıi boıynsha aldyńǵy qatarda. Memlekettik satyp alýdyń josparlaýdan bastap tólem jasaýǵa deıingi barlyq tsıkli tek elektrondyq formatta júzege asyrylady. Konkýrstar komıssııanyń qatysýynsyz reıtıngtik-baldyq júıe boıynsha ótkiziledi, jeńimpaz avtomatty túrde anyqtalady. Bul sýbektıvtilikke jol bermeıdi. Osy sharalardyń nátıjesinde jyl basynan beri Qazaqstan bıýdjetiniń qarajatyn únemdeý shamamen $1,5 mlrd-ty (766 mlrd teńgeden astam) qurady.
Elimizdiń Premer-mınıstri ozyq IT-sheshimderdiń damýyn jáne tsıfrlyq quraldardyń artyqshylyqtaryn tolyq paıdalaný múmkindigin eskere otyryp, memlekettik satyp alý salasyndaǵy EAEO-nyń kelisimsharttyq bazasynyń jekelegen normalaryn ózektendirý qajettigin atap ótti.
Birlesken bıznes-bastamalardy qoldaýdyń tıimdi quraly — ónerkásiptik kooperatsııany qarjylandyrýdyń qoldanystaǵy tetigi. Bıyl EAEO bıýdjeti esebinen 5 joba, onyń ishinde mashına jasaý jáne t/j ónerkásibi salasyndaǵy qazaqstandyq bıznestiń qatysýymen 3 joba maquldandy. EAEO elderiniń bıznes ókilderi tarapynan artyp kele jatqan qyzyǵýshylyqty eskere otyryp, qazaqstandyq tarap zamanaýı tsıfrlyq sheshimder men jasandy ıntellekt tehnologııalaryn paıdalanatyn kásiporyndarǵa basym tártippen sýbsıdııalar berý qajettigin atap ótti.
Bul joǵary tehnologııalyq óndirister men ınnovatsııalyq baǵyttardyń damýyna qosymsha serpin beredi ári jumys istep turǵan kásiporyndardyń qýattylyǵyn arttyrýǵa, jańa kásiporyndar ashýǵa, jańa jumys oryndaryn qurýǵa jáne memleketter ekonomıkalarynyń ósýine yqpal etedi.
Sondaı-aq artyq normalardyń paıda bolýyn boldyrmaýǵa, retteýdiń boljamdylyǵy men ashyqtyǵyn qamtamasyz etýge basa nazar aýdara otyryp, bıznesti júrgizý úshin jaǵdaılardy jetildirý máseleleri talqylandy.
Eýrazııalyq úkimetaralyq keńes otyrysynyń qorytyndysy boıynsha birqatar qujatqa qol qoıyldy.
Aıta keteıik, EAEO aýmaǵynda jańadan tirkelgen dárilerdiń 300-den astamy — qazaqstandyq ónim.
EAEO júk tasymalyn qadaǵalaý júıesin engizedi.