Oljas Bektenov ІІM Basqarý akademııasynyń ashylýyna qatysty
ASTANA. KAZINFORM — Prezıdent Qasym-Jomart Toqaevtyń tapsyrmasy boıynsha jarııalanǵan «Zań jáne tártip» aptalyǵy aıasynda Astanada QR ІІM Basqarý akademııasynyń ashylýy ótti, dep habarlaıdy Úkimettiń baspasóz qyzmeti.
Premer-mınıstr Oljas Bektenov quttyqtaý sózinde jańa oqý orny Prezıdenttiń qoǵamdyq qaýipsizdikti nyǵaıtý, memlekettik basqarýdyń tıimdiligin arttyrý jáne kadrlyq áleýetti jańǵyrtý jónindegi júıeli saıasatynyń aıasynda júzege asyrylyp otyrǵan asa qadam ekenin atap ótti. Sońǵy jyldary aǵymdaǵy syn-qaterlerge qarsy kúresti kúsheıtý baǵytynda naqty sharalar qabyldandy. Atap aıtqanda, Esirtki qylmysyna qarsy is-qımyl komıteti quryldy, kıberqaýipterge jáne turmystyq zorlyq-zombylyqqa qarsy is-qımyl boıynsha mamandandyrylǵan bólimsheler ashyldy, tsıfrly ınfraqurylym men taldamalyq baza nyǵaıtylyp jatyr.
— Akademııanyń qurylýy — Memleket basshysy jarııalaǵan quqyq qorǵaý júıesiniń damý jolyndaǵy eleýli kezeń. Bizdiń mindetimiz — kadrlyq áleýetti nyǵaıtý arqyly quqyqtyq tártipti qamtamasyz etýdiń jańa modelin engizý. Instıtýtsıonaldyq reformalar quqyq qorǵaý organdarynyń servıstik modelin damytýǵa yqpalyn tıgizedi. Prezıdent usynǵan basym baǵyt — azamattardyń qaýipsizdigi jáne «Zań jáne tártip» qaǵıdatyn qamtamasyz etý, — dep atap ótti Oljas Bektenov.
Prezıdenttiń tapsyrmasy boıynsha iske qosylǵan quqyq qorǵaý organdaryn qaıta jańǵyrtý — strategııalyq oılaı alatyn basqarýshylar býynyn qalyptastyrýǵa múmkindik beredi. Sondaı-aq tehnologııalyq novatsııalardy engizý quraldaryn keńeıtip, jahandyq tsıfrlandyrý jáne jasandy ıntellektini jappaı engizý jaǵdaıynda kóshbasshylyq pen básekege qabiletti jumystyń zamanaýı tásilderin meńgerýge jol ashady.
Akademııanyń ashylýy barysynda Oljas Bektenov sonymen qatar oqý orny ınfraqurylymymen, jáne quqyq qorǵaý organdary qoldanatyn zamanaýı tehnologııalarmen, atap aıtqanda tsıfrly zerthana, tsıfrly sheshimder aýdıtorııasy, jol qaýipsizdigin qamtamasyz etýde jasandy ıntellekti kómegimen taldaý, kiriktirilgen radar ornatylǵan patrýldik avtomobılderdi qashyqtan baqylaý platformasy, robottandyrylǵan tehnıka, «aqyldy kózildirik» jáne basqa da ozyq tehnologııalarmen tanysty.
Іshki ister mınıstri Erjan Sádenov premer-mınıstrge vedomstvoaralyq joǵary akademııalyq kýrs tyńdaýshylaryn synaqtan ótkizý nátıjelerin kórsetti. Akademııa baǵdarlamasy basqarý quzirettiligini damytýǵa, zamanaýı tásilderdi meńgerýge baǵyttalǵan. Jyl saıyn munda basshylyq quramdy daıarlaý baǵyttary boıynsha 100-den astam adam, sondaı-aq magıstratýra jáne doktorantýra baǵdarlamalary boıynsha 30 adam bilim alady.
Búginde Akademııa ishki ister organdarynyń aýmaqtyq bólimshelerinen tyńdaýshylardyń alǵashqy legin daıyndaýdy bastady. ІІM Basqarý akademııasynyń ashylýyna Bas prokýratýra, Ulttyq qaýipsizdik komıteti, Joǵarǵy Sot Keńesi, mınıstrlikter, ákimdikter basshylyǵy, Parlament depýtattary, ІІM Qoǵamdyq keńesiniń músheleri, ІІM júıesindegi JOO basshylyǵy men oqytýshylary, salalyq vedomstvolardyń sheteldik delegatsııalary, halyqaralyq uıymdardyń, ǵylymı jáne saraptamalyq qoǵamdastyqtyń, sondaı-aq jeke sektor ókilderi qatysty.
Budan buryn Premer-mınıstr Oljas Bektenov Senat depýtattarynyń jastar arasynda tártip pen jaýapkershilikti arttyratyn jańa baǵdarlama ázirleý usynysyna jaýap berdi.