Oljas Bektenov qurylys salasyndaǵy sheshimin tappaǵan máselelerdi atady
ASTANA. KAZINFORM – Bıyl turǵyn úı qurylysynyń qarqyny boıynsha artta qalý qaýpi bar. Bul týraly Úkimet otyrysynda Premer-mınıstr Oljas Bektenov aıtty.
- Qurylys salasynda da bıyl turaqty dınamıkany qamtamasyz etý qajet. Qurylys maýsymy bastaldy, alaıda birqatar júıeli másele áli kúnge deıin sheshimin tappaı otyr. Atap aıtqanda, jalǵa beriletin turǵyn úıdi qarjylandyrý arqyly qurylys jumystaryn yntalandyrý jáne jańa qurylys aýdandaryna ınjenerlik ınfraqurylymdy ýaqtyly tartýda máseleler bar. Shyn máninde buǵan ákimdikter tarapynan jete mán berilmeı keledi ári jobalardy iske qosý baǵytynda da belsendi jumys baıqalmaıdy, - dedi Úkimet basshysy.
Premer-mınıstrdiń dereginshe, turǵyn úı qurylysyna 516 mlrd teńge qajet. Al óńirler 249 mlrd teńgeniń ótinimin ǵana rastaǵan. Bul qajetti deńgeıden shamamen eki ese tómen.
- Eger ákimdikter tez arada tıisti sheshim qabyldamasa, turǵyn úı qurylysynyń qarqyny boıynsha artta qalý qaýpi bar. Osyǵan baılanysty Ulttyq ekonomıka jáne Qarjy mınıstrlikterine bir apta ishinde jergilikti bıýdjetterge paıyzdyq mólsherlemeni ótep, oblıgatsııalar boıynsha negizgi boryshty jabýǵa múmkindik beretin naqty tetikterdi ázirleýdi, sondaı-aq atalǵan quraldarǵa óńirlerdiń qatysýy úshin ashyq jaǵdaı jasaýdy tapsyramyn. Naqty parametrleri men qarjylandyrý kózderi aıqyndalǵan daıyn sheshimder qajet, - dedi Oljas Bektenov.
Buǵan deıin Úkimet basshysy mal sharýashylyǵynda ónimdilikti ulǵaıtýdy tapsyrǵanyn jazǵan edik.
