Oljas Bektenov qurylys salasyn tsıfrlandyrýǵa qatysty naqty 3 tapsyrma berdi
ASTANA. KAZINFORM – Elimizde qurylys salasyn tsıfrlandyrý barysynda birqatar kemshilik pen úılestirý jumystaryna qatysty máseleler anyqtaldy. Úkimet otyrysynda QR Premer-mınıstri Oljas Bektenov tıisti vedomstvolar men óńir ákimdikterine olardy sheshý úshin naqty 3 tapsyrma júktedi.
– Qurylys blogyn tsıfrlandyrýdy erekshe ári turaqty baqylaýda ustaý kerek. Osyǵan baılanysty mynandaı negizgi mindetterge toqtalǵym keledi. Birinshi, ótken jyldyń qarasha aıynda 89 qalada ınfraqurylymdyq derekterdiń geoportaly arqyly ruqsat qujattamasyn berý men eskızdik jobalardy kelisýdiń pılottyq jobasy iske qosyldy. Nátıjesinde birqatar eldi mekende naqty shekaralardyń bekitilgen bas josparlarmen sáıkes kelmeýi, sondaı-aq keıbir jer ýchaskeleriniń durys berilmegeni anyqtaldy. Aýyl sharýashylyǵy, ónerkásip jáne qurylys mınıstrlikterine, óńir ákimdikterine jáne «Azamattarǵa arnalǵan úkimet» korporatsııasyna osy jylǵy 1 qyrkúıekke deıin derekterdegi sáıkessizdikterdi joıýdy tapsyramyn. Ekinshi, qurylystaǵy jasandy ıntellekt jobalaý, qala qurylysyn basqarý isinde jáne basqa da salalarda sheshim qabyldaý kezinde kómekshige aınalýǵa tıis. Tsıfrlyq damý, ónerkásip jáne qurylys mınıstrlikterine qurylys salý tyǵyzdyǵyn ınfraqurylymdy damytýdyń tehnıkalyq sharttary men deńgeıine sáıkestigin qosa alǵanda, 1 aı merzimde qurylys salasyndaǵy JI modýlderiniń aýqymyn keńeıtý boıynsha sheshimderdi ázirleýdi tapsyramyn. Úshinshi, ınjenerlik jelilerge qosylý úshin tehnıkalyq sharttar berý rásimine bıznes pen turǵyndardyń tarapynan kóptegen shaǵym túsip jatyr. Olardy berýdiń qoldanystaǵy bulyńǵyr, tym uzaq ári sybaılas jemqorlyq táýekelderin kúsheıtedi. Ulttyq ekonomıka mınıstrligine múddeli memlekettik organdarmen birlesip, qala qurylysy kadastrlyq júıesi arqyly tehnıkalyq sharttardy mindetti túrde tsıfrlyq formatta berý jóninde júıeli sharalardy qabyldaýdy tapsyramyn, - dedi Úkimet basshysy.
Baqylaý men úılestirý Roman Sklıarǵa júkteldi.
Aıta keteıik, elimizde qurylys salasyndaǵy barlyq portal ıntegratsııalanyp, biryńǵaı aqparattyq júıe qurylady.
Qazirdiń ózinde 89 qalada bastapqy ruqsat qujattaryn, tehnıkalyq sharttardy berý tsıfrlyq júıe arqyly iske asyrylyp jatyr.
Odan bólek 2026 jyly elimizde egjeı-tegjeıli josparlaý jobalaryn iske asyrýdy jasandy ıntellekt baqylap otyratyn bolady.