Oljas Bektenov Qostanaı oblysyndaǵy bilim berý nysandaryna bardy
ASTANA.KAZINFORM - Premer-mınıstr Oljas Bektenov Qostanaı oblysyna jumys sapary barysynda Memleket basshysynyń bilim berý men densaýlyq saqtaý salalarynyń ınfraqurylymyn damytý jónindegi tapsyrmalarynyń iske asyrylýyn tekserdi. Bul týraly Úkimettiń baspasóz qyzmeti habarlady.
Oljas Bektenov Y.Altynsarın atyndaǵy Arqalyq pedagogıkalyq ýnıversıtetine baryp, óńirdegi joǵary bilim berýdi damytý boıynsha atqarylyp jatqan jumystarmen tanysty. Ýnıversıtettiń ınfraqurylymyna oqý korpýsy, 2 jataqhana, tájirıbe bazasy, sporttyq-saýyqtyrý kesheni, murajaılar men medıtsınalyq kabınetter kiredi. Munda 2,6 myńnan astam stýdent pen magıstrant bilim alady.
Y.Altynsarın atyndaǵy ýnıversıtet rektory Talǵat Eşjanov ýnıversıtet ǵımarattarynyń birin 20 zerthanasy men 15 dáris zaly bar zamanaýı oqý korpýsyna aınaldyrý maqsatynda rekonstrýktsııalaý josparlary týraly baıandady. Bul kontıngentti 2 esege arttyrýǵa jáne 5,2 myń stýdentke jetkizýge múmkindik beredi. Sonymen qatar IT, ekonomıka, aýyl sharýashylyǵy jáne basqa da mamandyqtar boıynsha kadrlar daıarlaý úshin JOO-nyń bilim berý baǵdarlamalary men ǵylymı bazalaryn keńeıtý josparlanyp otyr.
Premer-mınıstr ekonomıkalyq ósýdiń negizi retinde adamı kapıtaldy damytý boıynsha júrgizilip jatqan jumystyń mańyzyn atap ótti.
— Zamanaýı eńbek naryǵy jańa tehnologııalardyń jedel damýy aıasynda tez ózgerip jatyr. Biz ekonomıkamyz úshin basym salalar boıynsha myqty ári básekege qabiletti mamandar daıarlaýymyz kerek. Oǵan qol jetkizý úshin bizge, ásirese, óńirlerdegi bilim berý ınfraqurylymyn jaqsartý mańyzdy. Memleket basshysynyń tapsyrmasy boıynsha Arqalyq pedagogıkalyq ýnıversıtetin damytýǵa, onyń ishinde oqý ǵımaratyn rekonstrýktsııalaýǵa Arnaýly memlekettik qordan 1,9 mlrd teńge bólindi. Joǵary sapaly baza JOO-ǵa jańa ekonomıkalyq ıdeıalardy iske asyrýǵa baǵyttalǵan ǵylymı-zertteý jobalaryn belsendi túrde damytýǵa múmkindik beredi. Innovatsııalyq tehnologııalardy engizýge jáne bilim berýdiń zamanaýı ádistemelerin damytýǵa nazar aýdarý kerek, — dep atap ótti Oljas Bektenov.
Sondaı-aq Premer-mınıstr Arqalyq qalasynda Prezıdenttiń bastamasymen qolǵa alynǵan «Jaıly mektep» ulttyq jobasy aıasynda salynǵan №7 jalpy bilim beretin mektepte boldy. 300 oryndyq jaıly mekteptiń ashylýy zaman talabyna saı sapaly bilim alýdy qamtamasyz etti. Oqýshylar úshin robototehnıka kabınetteri, STEM zerthanasy, tsıfrlyq kitaphana, mýzyka kabıneti, sport, shyǵarmashylyq jáne ǵylymı úıirmeler jumys isteıdi. Sonymen qatar ınklıýzıvti bilim berýdi damytýǵa basa nazar aýdarylady.
Jalpy, Qostanaı oblysynda 2024–2025 jyldary «Jaıly mektep» ulttyq jobasy aıasynda 3 300 oryndyq 4 mektep qoldanysqa berildi. Búginde 7 mekteptiń qurylysy júrgizilip jatyr, onyń ishinde eki yńǵaıly mektep (Rýdnyı qalasynda 900 oryndyq jáne Áýlıekól aýdanynyń Qusmuryn aýylynda 300 oryndyq).
3 240 oryndyq 5 jalpy bilim berý mekemesin 2025 jyly tapsyrý josparlanyp otyr. Jalpy Qazaqstan boıynsha 2025 jyldyń sońyna deıin 217 jaıly mekteptiń qurylysy josparlanǵan, onyń ishinde 105 mektep paıdalanýǵa berilgen.
Sondaı-aq Premer-mınıstr Arqalyqta azamattarǵa kórsetiletin medıtsınalyq qyzmettiń sapasyn arttyrý sharalaryn tekserdi. Atap aıtqanda, búginde kúrdeli jóndeý jumystary júrgizilip jatqan Arqalyq óńirlik aýrýhanasynyń perzenthana ǵımaratyna bardy. Perzenthana ǵımaraty tóbesi, qabyrǵalary qalpyna keltirilip, jylý, sý, káriz júıelerin jańartýmen qatar, zamanaýı qurylǵylarmen jabdyqtalmaq.
Jobanyń jalpy quny shamamen 1,2 mlrd teńge. Búginde qurylys-montaj jumystary 70% aıaqtaldy. Premer-mınıstrdiń tapsyrmasy boıynsha jaqyn arada medıtsınalyq nysanda kúrdeli jóndeýdi aıaqtaý úshin qarajat bólinetin bolady.
Oljas Bektenov Memleket basshysynyń tapsyrmalaryn oryndaý boıynsha keńes ótkizdi.