Oljas Bektenov: Qosylǵan qun salyǵyn kóterý – májbúrli qadam

ASTANA. KAZINFORM — Premer-mınıstr Oljas Bektenov Úkimette ótken baspasóz máslıhatynda keler jyly qabyldanatyn Salyq kodeksi men QQS kóterýge aıtylǵan synı pikirlerge jaýap berdi.

− Salyq kodeksinde qosylǵan qun salyǵyn 16 paıyzǵa deıin kóterý qarastyrylǵany ras. Árıne, kez kelgen salyqty arttyrý aýyr tıedi. Biraq bul - májbúrli qadam. Osy salyq reformasy arqyly biz damý bıýdjetin anaǵurlym ulǵaıtýdy josparlap otyrmyz. Buǵan deıin ekonomıkalyq ósim týraly aıtyldy. Ekonomıkalyq ósim tek qana memleket ınfraqurylymdy jedel qarqynmen damytqan jaǵdaıda múmkin bolady. Sebebi kez kelgen bıznestiń damýy úshin ınfraqurylym qajet. Al ınfraqurylymdy damytý úshin damý bıýdjeti kerek, − dep jaýap berdi Premer-mınıstr tilshi suraǵyna.

Premerdiń aıtýynsha, bizdegi damý bıýdjetiniń deńgeıi syn kótermeıtindeı tómen. Ol memleketke ekonomıkanyń damý qarqynyna ilesip, ınfraqurylymdy tez qarqynmen damytýǵa tolyq múmkindik bermeıdi.

− Sondyqtan biz 2026 jyly Salyq kodeksin qabyldaý arqyly qosymsha bıýdjettik kirister alýdy, damý bıýdjetin shamamen 8 paıyzǵa arttyrýdy, ony 18 paıyzǵa jetkizýdi kútip otyrmyz. Bul bizge turaqty ekonomıkalyq ósimdi qamtamasyz etýge múmkindik beredi. Árıne, salyqtardyń ósýi únemi synǵa ushyraıdy. Biraq munda bıznestiń, memlekettiń jáne qoǵam múddeleri arasyndaǵy tepe-teńdikti saqtaý qajet. Bendjamın Franklın aıtypty: «Bul ómirde qashyp qutyla almaıtyn eki nárse bar – ólim men salyq». Ókinishke qaraı, bul - shyndyq. Biz árıne, aldaǵy salyq ósimi bıznestiń belsendiligine, iskerlik ahýalǵa teris áser etpeýi úshin barynsha tyrysamyz. Bizdiń baǵalaýymyzsha, teris yqpal bolmaıdy, − dep tolyqtyrdy Oljas Bektenov.

Aıta keteıik, búgin Úkimette bıylǵy qańtar-maýsym aılaryndaǵy áleýmettik-ekonomıkalyq damý jáne respýblıkalyq bıýdjettiń atqarylý qorytyndylary qaraldy.

Buǵan deıin Premer-Mınıstr 2029 jylǵa deıin jalpy ishki ónimdi 450 mlrd dollarǵa jetkizý týraly Prezıdent tapsyrmasyn oryndaý qanshalyqty múmkin ekeni týraly pikir bildirdi.