Oljas Bektenov Qordaıdaǵy kólik-logıstıkalyq keshen salý jumysynyń barysyn tekserdi
ASTANA. KAZINFORM — Premer-mınıstr Oljas Bektenov jumys saparymen Jambyl oblysynda bolyp, mýltıplıkatıvtik áseri bar birqatar iri jobany júzege asyrylýyn mysalǵa ala otyryp, óńirdiń áleýmettik-ekonomıkalyq damýymen tanysty.
Jambyl oblysynyń ákimi Erbol Qarashókeev negizgi ekonomıkalyq kórsetkishter týraly baıandady. Jalpy óńirlik ónim ótken jyldyń sońynda 2,2 trln teńge boldy. Ónerkásip óniminiń kólemi 188 mlrd teńgege jetse, onyń 122,5 mlrd teńgesi óńdeý salasyna tıesili.
Premer-mınıstr «Alataý» ındýstrııalyq saýda logıstıkalyq keshenin mysalǵa ala otyryp, óńirde ekonomıkanyń jańa ósý baǵyttaryn qalyptastyrý boıynsha istelip jatqan jumystardyń barysyn tekserdi.
Qordaı aýdanynda Qazaqstan tarapyndaǵy «Qarasý» jáne Qyrǵyzstan tarapynan «Aq-Tilek» ótkizý beketterine irgeles jatqan ındýstrııalyq saýda-logıstıkalyq keshenniń (ISLK) aýmaǵyn aralady. Atalǵan joba eki memleket basshylary Qasym-Jomart Toqaev pen Sadyr Japarov qoıǵan ózara taýar aınalymyn $3 mlrd-qa deıin ulǵaıtý jónindegi mindetteri aıasynda júzege asyrylyp jatyr. QR Qyrǵyzstandaǵy Tótenshe jáne ókiletti elshisi Rápil Joshybaev pen Qyrǵyz Respýblıkasynyń ekonomıka jáne kommertsııa mınıstri Baqyt Sydyqov júrgizilip jatqan birlesken jumystar týraly aıtty.
Búgingi tańda sút, et, jıdek jáne kókónis, toqyma, farmatsevtıka jáne basqa da ónimder óndirisi salasyndaǵy kooperatsııalyq jobalar úshin ınfraqurylym qurylyp jatyr. Jańadan taýarlar óndirý jáne olardy halyqaralyq taýar ótkizý júıelerine tıimdi ıntegratsııalaý arqyly ári qaraı satý basty maqsat bolyp otyr.
«Romsey Holdings KZ» JShS ındýstrııalyq keshen kompanııasynyń basqarýshy dırektory Abzal Myńbaev ındýstrııalyq saýda-logıstıkalyq keshen (ISLK) aýmaǵyna ınvestıtsııa tartý boıynsha istelip jatqan jumys jáne Qazaqstan aýmaǵynda aýyl sharýashylyǵy ónimderin, plastık ydystardy qaıta óńdeý, kabeldik ónimder men farfor ydystaryn daıyndaıtyn óndiris oryndaryn ashý týraly josparlaryn baıandady. Atalǵan jobalar boıynsha ınvestıtsııalardyń jalpy somasy shamamen 40 mlrd teńge. Sonymen qatar ISLK-ti Jibek JOLY arnaıy ekonomıkalyq aımaǵynyń qosalqy aımaǵy retinde qaıta uıymdastyrý jumysy istelip jatyr, bul ınvestıtsııalyq tartymdylyqty arttyrady.
— Memleket basshysy taıaýda ótken keńeste el ekonomıkasynyń ósý qarqyny men tartylǵan ınvestıtsııa kólemin tómendetpeý mindetin qoıdy. Aýqymdy ındýstrııalyq saýda-logıstıkalyq keshenniń qurylýy ónerkásiptik óndiristi damytýǵa, daıyn ónimdi ótkizýdiń tıimdi júıesin qurýǵa, sondaı-aq jańa jumys oryndaryn ashýǵa múmkindik beredi. Bul baǵytta ınvestıtsııadan bastap jetkizýge deıingi barlyq tizbek boıynsha belsendi jumys isteý mańyzdy. Jobaǵa járdemdesý úshin ınjenerlik ınfraqurylym máselelerin múmkindiginshe qysqa merzimde sheshý qajet, — dep atap ótti Oljas Bektenov.
Sondaı-aq «KORCEM» JShS tsement zaýytynda Premer-mınıstr óńirdiń qurylys ındýstrııasynyń damýymen tanysty. Ótken jyly iske qosylǵan kásiporynnyń óndiristik qýaty jylyna 1,3 mln tonna tsement. Ónimder ishki naryqta satylady, sonymen qatar Ózbekstan, Reseı jáne Qyrǵyzstanǵa eksporttalady. «KORCEM» JShS bas dırektorynyń orynbasary Stanıslav Şerbakov qaldyqtar men shań jınaý qurylǵylardyń joǵary súzý júıelerin qamtıtyn ozyq tehnologııalardy óndiriste qoldaný týraly habardar etti. Zaýytta halyqaralyq standarttarǵa sáıkes DCS ıntellektýaldy júıesi engizildi. Barlyq tehnologııalyq tsıkl mehanıkalyq úderisterdi basqarýǵa múmkindik beretin ortalyq basqarý pýltinen júzege asyrylady.
Premer-mınıstr Ónerkásip jáne qurylys mınıstrligine qazaqstandyq naryqty otandyq tsementpen qamtamasyz etý jáne eksporttyq naryqtardy keńeıtý isinde zaýytqa járdemdesýdi tapsyrdy.
Aıta ketelik Oljas Bektenov CITIC Construction basshysy ıAn Tszıantsıanmen kezdesken edi.