Oljas Bektenov kontrafaktilik ónimdermen kúres jumystaryn kúsheıtýdi tapsyrdy
ASTANA. KAZINFORM — Premer-Mınıstr Oljas Bektenovtiń tóraǵalyǵymen ótken keńes barysynda saýdany tsıfrlandyrý arqyly kóleńkeli ekonomıkany azaıtý máseleleri qaraldy. Saýda jáne ıntegratsııa, Qarjy, Ónerkásip jáne qurylys, Aýyl sharýashylyǵy mınıstrlikteriniń atqaryp jatqan jumystary, sondaı-aq «Atameken» UKP ókilderiniń pikirleri tyńdaldy.
Jıynǵa qatysýshylar kóleńkeli ekonomıkamen kúreste tıimdi quraldardyń biri bolyp sanalatyn taýarlardy tańbalaýdy engizýdiń oń áserin atap ótti.
Qazaqstanda temeki jáne aıaq kıim buıymdary, sonymen qatar bıylǵy 1 shildeden beri barlyq dári-dármekter sáıkestendirý quraldarymen mindetti tańbalaýǵa jatady.
Saýda jáne ıntegratsııa mınıstrliginiń málimetinshe, temeki ónimderin mindetti tańbalaý engizilgennen keıin onyń barlyq túrleri boıynsha aktsız túsimderi 25%-ǵa ósken. Sonymen qatar kontrafaktilik ónimderdi anyqtaý múmkindigi artty.
Máselen, elimizde 2022 jyldan bastap 2024 jyldyń І toqsanyna deıin 15 mlrd teńge kóleminde zańsyz temeki ónimi tárkilendi.
Bul rette ımporttalǵan aıaq kıim buıymdarynan QQS jáne kedendik baj túsimderi 293%-ǵa: 2021 jylǵy 7,8 mlrd teńgeden 2023 jyly 30,7 mlrd teńgege deıin ósti.
Sonymen qatar tańbalaýdy taýarlardyń basqa toptaryna engizý josparlary talqylandy, aldaǵy 5 jylǵa arnalǵan boljamdarǵa sáıkes, ony iske asyrý kóleńkeli aınalymdy taǵy da 926 mlrd teńgege qysqartýǵa, baqylanatyn ekonomıkanyń úlesin 23%-ǵa, bıýdjet túsimderin 270 mlrd teńgege ulǵaıtýǵa múmkindik beredi.
«Biz ekonomıkanyń ashyq ári zańdy júrýine, naryǵymyzdyń tolyq qadaǵalanýy men ashyqtyǵyna qol jetkizýimiz kerek. Bul rette bıznes múddeleri eskerilýi tıis. Orta merzimdi perspektıvada taýarlardy tańbalaýǵa kóshýdiń naqty kestesi men merzimderin ázirleý qajet. Kásipkerler ózderin aldaǵy ýaqytta ne kútip turǵanyn bilýi kerek. Eger biz taýarlardyń jekelegen toptary boıynsha artta qala bastasaq, onda óndirýshilerimizge qosymsha memlekettik qoldaý kórsetý sharalaryn pysyqtaý qajet», — dep Oljas Bektenov, salalyq memlekettik organdarǵa tańbalaýdy engizýdiń oń áserleri týraly jurtshylyq pen bıznesti habardar etý jónindegi jumysty kúsheıtýdi tapsyrdy.
Sondaı-aq Qazaqstanda Taýarlardy qadaǵalaýdyń ulttyq júıesiniń pılottyq jobasyn iske asyrý barysy qaraldy. Atalǵan joba taýarlardyń jetkizýshilerden satyp alýshylarǵa ótýin qadaǵalaýǵa, búkil jetkizý tizbegin baqylaýǵa, naqty ýaqyt rejıminde taýarlardyń óńirlik aýyl sharýashylyǵy óndiristik kooperatıvteri qoımalarynda bolýy jáne qozǵalysy týraly aqparatty tirkeýge múmkindik beredi. Sondaı-aq derekterdi óńdeý ýaqytyn qysqartady ári taýar aınalymyn baqylaýdyń tıimdiligin arttyrady.
Pılottyq jobany iske asyrý nátıjesinde 89,4 mlrd teńge kóleminde aýyl sharýashylyǵy óndiristik kooperatıvteriniń sharttary 100% tsıfrlandyryldy, áleýmettik mańyzy bar azyq-túlik taýarlaryn óndirýshiler men ótkizýshilerdiń 95%-y qamtyldy.
Buǵan qosa, Ulttyq júıeni keńeıtý jáne oǵan 58 taýar pozıtsııasynan turatyn azyq-túlik sebeti men sonyń negizinde ınflıatsııa esepteletin 488 taýardan turatyn tizbeni engizý josparlary qaraldy.
Keńes qorytyndysy boıynsha Úkimet basshysy tıisti mınıstrlikterge kontrafaktilik taýarlardy anyqtaý sharalaryn kúsheıtýdi, sondaı-aq aıaqtalǵan pılottyq jobalar boıynsha taýar toptaryn mindetti tańbalaýdy engizý jáne baǵalardyń senimdi ári jedel monıtorıngin qamtamasyz etý maqsatynda taýarlardyń biryńǵaı katalogyn zańnamalyq turǵydan bekitý máselelerin pysyqtaýdy tapsyrdy.
